Qaraǵandylyq shirkeý okrýginiń ókili Aleksandr Ýgolkov pandemiia jaǵdaiynda Shoqyný merekesin ótkizý tártibin túsindirdi, dep habarlaidy "Ult aqparat" oblys ákimdigine silteme jasap.
Málim etilgendei, epidemiologiialyq jaǵdaidyń kúrdeliligine orai biyl shomylý oryndaryn duǵa oqyp tazartý is-sharalary júrgizilmeidi. Tiisinshe, sýǵa jappai shomylý da bolmaidy.
Bul rette sýdy tazartý barlyq ǵibadathanalardyń aýmaǵynda ótedi. 18 qańtar kúni tústen keiin sý alý úshin shirkeýge kele berýge bolady. Sondai-aq sý 19 qańtarda tańǵy saǵat 08.00-den keshke deiin taratylady. Taratý kóshede ótedi.
Shirkeýlerge kirýge tyiym joq. Qaraǵandy oblysynyń bas sanitarlyq dárigeriniń negizgi talaptaryna sai maska rejimin jáne áleýmettik qashyqtyqty saqtaý dini qyzmetkerler úshin de, halyq úshin de negizgi talap bolyp tabylady.
Shirkeý ókiliniń aitýynsha, Shoqyný merekesinde sýǵa súńgý shirkeýdiń emes - halyqtyń dástúri.
«Sýǵa súńgý - halyq dástúri. Oǵan arnaiy daiyndalmaǵan adamdar úshin bul qaýipti bolýy múmkin. Bul rette bir-birimizge degen súiispenshilik pen qamqorlyq mańyzdyraq.
Buryn bul kúni muqtaj adamdarǵa barý, olarǵa kómek kórsetip, merekelik kóńil-kúi syilaý dástúri bolǵan. Mereke beker ótpeýi úshin bul kúni igi ister jasańyzdar», - dedi protoirei Aleksandr Ýgolkov.
Shirkeý ókilderi mereke kúni jappai shomylýǵa tyiym salý sharalaryna túsinistikpen qaraýdy suraidy.
