Qaraǵandy oblysynda múmkindigi shekteýli jandarǵa bólingen biýdjet qarajatyn jymqyrý deregi tergelip jatyr. Tapsyrys berýshi JShS-ǵa bir jarym million teńgege jýyq qarajatty negizsiz tólegen, - dep habarlaidy "Ult aqparat" Qarjylyq monitoring agenttigine silteme jasap.
"QMA Qaraǵandy oblysy boiynsha departamenti Qamqor jedel-aldyn alý sharasy barysynda anyqtalǵan múmkindigi shekteýli jandardy sanatoriialyq-kýrorttyq emdelý, saýyqtyrý demalysymen qamtamasyz etýge bólingen biýdjet qarajatyn jymqyrý qylmystyq shemasy boiynsha isti tergep jatyr.
Tergeý barysynda tapsyrys berýshi men JShS arasynda merzimi naýryzdan jeltoqsanǵa deiin múgedekterdi sanatoriialyq-kýrorttyq emdeý, emdik-saýyqtyrý demalysyn qamtamasyz etý boiynsha 50 million teńgege jýyq somaǵa memlekettik satyp alý týraly kelisimshart jasalǵany anyqtaldy", - delingen habarlamada.
QMA málimetinshe, tapsyrys berýshiniń sybailas jemqorlyq táýekelderiniń ishki taldaýyn tekserý aktisimen, múgedekterdiń shipajaiǵa barýdyń jalǵan derekteri anyqtalǵan.
"JShS-ǵa bir jarym million teńgege jýyq qarajat negizsiz tólengen. Tergeý jalǵasyp jatyr. QR QPK-nyń 201-babyna sáikes tergeý múddesindegi ózge de málimet jariia etilmeidi", - delingen habarlamada.
