Foto: Polisia.kz
5 naýryzda IIM uiymdasqan qylmysqa qarsy kúres departamenti men UQK 5-shi departamenti birlesip, Qaraǵandy oblysyndaǵy kriminogendik jaǵdaiǵa uzaq ýaqyt boiy teris áser etip kelgen qylmystyq top áreketiniń jolyn kesý boiynsha arnaiy operatsiia júrgizdi, – dep habarlaidy Polisia.kz.
Bul toptyń músheleri atys qarýyn qoldanyp, túrli qaqtyǵystar uiymdastyrǵan. Osylaisha qoǵamdyq tártipti buzǵan.
Jedel derekter boiynsha top músheleriniń sany 50-ge jýyq, onyń ishinde quqyq qorǵaý organdarynyń burynǵy qyzmetkerleri, sondai-aq kúzet uiymdarynyń qyzmetkerleri de bar. Kóshbasshy men top músheleri arasynda naqty ierarhiia qurylǵan. Árbiriniń óz róli men mindeti bolǵan. Jasyryný sharalary qatty saqtalǵan.
"Ótkizilgen arnaiy is-sharalar nátijesinde óńirdiń iri ónerkásiptik obektilerinde, onyń ishinde “Arsellor Mittal Temirtaý” Aktsionerlik qoǵamynda taýarlyq-materialdyq qundylyqtardy urlaý faktileri ashyldy.
Top músheleriniń birqatar ashylmaǵan aýyr jáne asa aýyr qylmystarǵa qatysy bary anyqtaldy – bul bopsalaý, densaýlyqqa aýyr ziian keltirý, kisi óltirýge oqtalý jáne buzaqylyq.
Arnaiy operatsiia barysynda 100-den astam tintý is-sharalary júrgizildi, 9 atys qarýy, 200-ge jýyq oq-dári, granatomet, trotil, granatalar, qujattar jáne jalǵan mórler, dini ádebietter, qolma-qol aqsha, jyljymaly jáne jyljymaityn múlik, sondai-aq qashyqtan tyńdaýǵa arnalǵan arnaiy tehnikalyq tyńdaý quraldary tárkilendi. Politsiiaǵa 40 adam jetkizildi. Jedel-tergeý sharalary jalǵasyp jatyr" - delingen habarlamada.
