Qaraǵandy oblysynda kenshilerdiń jalaqysy kóteriletin boldy, dep habarlaidy QazAqparat óńir ákimdiginiń resmi saityna silteme jasap.
«Abai» kenishindegi qaiǵyly oqiǵadan keiin kenshiler kótergen máseleler sheshimin tappaq. 10 kún boiyna kelisim komissiiasy jumys istedi, onyń quramyna kásipodaq uiymdary, ár kenishten belsendiler, jergilikti atqarýshy organ ókilderi kirdi. Komissiiany Qaraǵandy oblysynyń ákimi Jeńis Qasymbek basqardy.
Búgin aimaq basshysy J.Qasymbek Óńirlik kommýnikatsiialar qyzmeti alańynda ótken tikelei efirde kelisim komissiiasy jumysynyń qorytyndysyn baiandady.
«12 talap qoiyldy. Olardyń barlyǵy ádil. Men barlyq shahtalardy aralap shyqtym, kenshilermen kezdesýlerde tolǵandyratyn barlyq máseleni talqyladyq», – dep atap ótti Jeńis Qasymbek.
Kompaniia óz moinyna qandai mindettemelerdi aldy:
- jyl saiyn 1 qańtardan bastap infliatsiia deńgeiiniń 100% kóleminde jalaqyny indeksteýdi júzege asyrý;
- óndiristik-ekonomikalyq kórsetkishter josparynyń oryndalýyna qaramastan, biylǵy jeltoqsan aiynda 13-shi eńbekaqy tóleý;
- jeltoqsanda jalaqyny 15–17 paiyzǵa kóterý;
- kadr tapshylyǵyn joiý, ol úshin jeltoqsan aiynyń sońyna deiin normativti sandyq jáne shtattyq kesteni ázirlep, ai saiyn olar tolyq qamtylǵanǵa deiin keminde 100 adamdy jumyspen qamtý;
- jumys avtobýstaryn jańartý;
- 2018 jyldyń 1 qańtarynan keiin jumysqa ornalasqan qyzmetkerlerdiń demalys kúnderiniń sanyn kóbeitý;
- uzaq ýaqyt aýyrǵan adamdardyń eńbekke jaramsyzdyq paraǵyndaǵy tólemderdi 50 AEK-ke deiin arttyrý;
- shahtalarda tehnikalyq aýdit júrgizý jáne eskirgen jabdyqty paidalanýdan shyǵarý;
- taý-ken-geologiialyq jaǵdailarǵa bailanysty josparlaý tapsyrmalaryn túzetý.
Sondai-aq eńbek qaýipsizdigi máselelerine qatysty jumys toby quryldy. Mamandar 1996 jyldan beri oryn alǵan apattardyń barlyǵyn tekseretin bolady. Taldaý negizinde is-sharalar jospary jasalýy kerek.
Zańnamadaǵy ózgerister úsh máseleni, sonyń ishinde zeinet jasyn tómendetýdi talap etedi. Olar boiynsha úkimetke hattar joldanyp, jumystar júrgizilýde.
«Kelisim komissiiasynyń jumysy aiaqtalǵan joq. Qabyldanǵan sheshimderdiń oryndalýyn ózim qadaǵalaityn bolamyn. Ol úshin ai saiyn kezdesip, eki jaqty tyńdaityn bolamyz», – dep sendirdi Jeńis Qasymbek.
Sondai-aq oblys ákimi kenshiler qalalary – Abai, Shahtinsk jáne Sarandy damytý josparlaryna da toqtaldy. Bul qalalarda turǵyn úi qurylysyn, joldar men áleýmettik nysandardy jóndeý, kóshelerdi abattandyrý jalǵasady.
