Qaraǵandy oblysynda koronavirýs infektsiianyń yqtimal ekinshi tolqynyna daiyndyq kezeńinde dári-dármek qory qamtamasyz etilip, emhanalar men aýrýhanalardy jabdyqtaý kúsheitildi. Bul týraly óńir basshysy Jeńis Qasymbek Saryarqa telearnasynda ótken brifingte aitty, dep habarlaidy QazAqparat.
«Aýrýhanalar, emhanalar men dárihanalar úshin qajetti dári-dármek qoryn tolyqtyrdyq. «Farmatsiia» SK-men preparattardyń qosymsha kólemine ótinimder jasaldy. Qazir dári-dármek qory úsh ailyq normany quraidy. Onyń ishinde dispanserlik esepte turǵan barlyq patsientter qajetti dári-dármek qoryn qańtar aiyn qosqanda úsh aiǵa alady», - dep habarlady óńir basshysy.
Dárihanalarda satý úshin qosymsha qoljetimdi baǵamen «Azitromitsin», «Deksametazon», «Ibýprofen», «Levofloksatsin», «Nadroparin», «Rivaroksaban», «Tseftriakson» siiaqty preparattar satyp alynady. Bul syrqattanýshylyq maýsymy joǵarylaǵan kezde dári-dármek tapshylyǵyna jol bermeýge múmkindik beredi.
Sondai-aq, oblysta 1 mlrd teńgege dári-dármekterdiń turaqtandyrý qory quryldy. 80 myń paket virýsqa qarsy preparattar, 1 100 myń paket ystyqty túsiretin, 200 myń paket bakteriiaǵa qarsy preparattar satyp alyndy. Dári-dármektiń bul kólemi bólshek dárihana jelisinde satýǵa arnalǵan.
Jeńis Qasymbek aýrýhanalarǵa qandai jańa jabdyqtar berilgeni týraly da aityp berdi. 223 ÓJJ apparaty, 2 500 ottegi kontsentratory, 2 600 pýlsoksimetr, 40 sandyq rentgen apparattary satyp alyndy. 25 gospitalde ortalyqtandyrylǵan meditsinalyq gaz berý júiesi ornatylǵan.
Oblysta 18 kompiýterlik tomografiia kabineti jumys isteidi. Taǵy 4 kompiýterlik tomograf Shahtinsk, Balqash, Jezqazǵan, Sátbaev qalalarynda ornatylǵan.
Kadr máselesine de kóp kóńil bólinedi, dep atap ótti oblys ákimi. Óńirlerge jumys isteýge kelgen meditsina qyzmetkerlerine qyzmettik turǵyn úi beriledi. Biyl 120 páter qamtamasyz etilse, kelesi jyly taǵy 400 páter daiyn bolady.
Aimaq basshysy azamattyq jaýapkershiliksiz virýsty jeńý qiyn ekendigin aitty.
«Mindetti túrde betperde kiip, áleýmettik ara qashyqtyqty saqtap júrińizder. Bul sizderdiń densaýlyqtaryńyz ben ómirlerińizdi saqtaýdyń mańyzdy ádisteriniń biri», - dedi Jeńis Qasymbek qaraǵandylyqtarǵa qarata aitqan sózinde.
