Qaraǵandy oblysynda dala órtin sóndirý kezinde úsh adam zardap shekti. Olar aýrýhanaǵa jatqyzyldy, - dep habarlaidy "Ult aqparat".
Zardap shekkender - Qarqaraly aýdany Egindibulaq aýylynyń turǵyndary. Olardy 18, 28 jáne 90% kúiik shalǵan. Biriniń jaǵdaiy aýyr.
17 qyrkúiekte oblys aýmaǵyndaǵy Aqtoǵai (janý alańy - 200 ga, 500 ga, 2000 ga), Qarqaraly (janý alańy - 530 ga, 300 ga) jáne Shet aýdandarynda (aýmaǵy - 40 ga) 6 tabiǵi órt sóndirildi.
«Qarqaraly aýdanynyń Balqantaý aýyldyq okrýgindegi tabiǵi órtti aýyzdyqtaý barysynda 1989, 1979 jáne 1973 jyly týǵan Egindibulaq kentiniń 3 turǵyny aýrýhanaǵa jatqyzyldy. Olardyń denesin 18, 28 jáne 90% termiialyq kúiik shalǵan», - dep málimdedi Qaraǵandy oblystyq TJD baspasóz qyzmeti.
Búgin tańerteń 18 qyrkúiekte Aqtoǵai aýdanynda 300 ga alańda tabiǵi órt aýyzdyqtaldy.
Tabiǵi órtterdi joiýǵa 339 adam jáne 94 tehnika, onyń ishinde TJ departamenti (93 adam, 22 tehnika) jáne jergilikti atqarýshy organdardyń órtke qarsy erikti quralymdary (246 adam, 72 tehnika) jumyldyryldy.
