Qaraǵandy oblysynda maldy atyp urlady degen kúdikpen birneshe adam ustaldy, dep habarlaidy QazAqparat.
Polisia.kz-tiń jazýynsha, 1 naýryzdan beri Qaraǵandy oblysynda «Skotokrad» respýblikalyq jedel-aldyn alý sharasy ótip jatyr.
«Alǵashqy úsh kúnniń ózinde ǵana politsiia qyzmetkerleri toǵyz ret mal urlaǵan segiz uryny ustady. Buryn jasalǵan 14 qylmystyń beti ashyldy. 11 ret mal urlaǵan eki qylmystyq top áshkere bolyp, ustaldy. Shet aýdanynda 2020 jyly maldy atyp, áketip otyrǵan top ustaldy. Olardyń bul áreketinen 2, 4 mln teńge shyǵyn kelgen. Tintiý kezinde olardan tirkelmegen atys qarýy men zattai aiǵaqtar tárkilendi», – deidi Qaraǵandy politsiia departamentiniń bastyǵy Ábil Ábildin.
Al Ulytaý aýdanynda 2021 jyly 3 mln teńgeniń iri qarasyn urlady degen kúdikpen eki adam ustaldy. Atalǵan faktiler boiynsha QR Qylmystyq kodeksiniń 188-1 baby boiynsha (Mal urlyǵy) qylmystyq is qozǵalǵan.
Kúdiktilerdiń qylmysy dáleldense, 3 jyldan 12 jylǵa deiin bas bostandyqtarynan aiyrylyp, múlikteri tárkilenýi múmkin.
«Mal urlyǵyna tosqaýyl qoiý úshin respýblikalyq jáne oblystyq mańyzdaǵy tasjoldarda blokbeket ornatylǵanyn aitý kerek. Búginge deiin 90 bas mal tabylyp, ielerine qaitaryldy», - deidi politseiler.
