Qaraǵandy oblysynda 936 myń ga alqapta astyq jinaý mindeti tur, keibir sharýashylyqtar qazirdiń ózinde jumysyn bastady, al jappai jinaý naýqany - qyrkúiek aiynda, dep habarlaidy "Ult aqparat".
Bul týraly Aýyl sharýashylyq basqarmasy basshysynyń m.a. Syrym Boshpanov onlain rejiminde ótken apparattyq keńeste habarlady.
«Biyl dándi daqyldardy jinaý alańy 935,9 myń ga quraidy, onyń ishinde bidai – 757 myń ga, arpa – 159,7 myń ga, budan basqa, sharýashylyqtar 25,2 myń gektar alqapta maily daqyldardy, kartop – 11,2 myń ga, as kók – 1619 ga jinaidy. Búgingi tańda Abai, Buqar jyraý, Jańaarqa jáne Shet aýdandarynyń jekelegen sharýashylyqtary egin jinaý jumystaryna kiristi. Astyqty jappai jinaýdy 1 qyrkúiekten bastaý josparlanyp otyr», - dedi baiandamashy.
Óńirde astyq óndirisi ishki tutynýdy tolyǵymen qamtamasyz etip, eksporttyq áleýetti qalyptastyratyny atap ótildi.
Aldyn ala boljam boiynsha, dándi daqyldardyń ortasha ónimdiligi gektaryna 8–10 tsentnerdi quraidy, kem degende 290 myń tonna kartop pen 55,6 myń tonna kókónis jinaý josparlanýda.
Egistikke 1 989 astyq jinaityn kombain shyǵady, onyń ishinde 70 jańa mashina osy
jyly satyp alyndy. Budan basqa, 3 myńnan astam tehnika jumyldyrylady.
Aýyl sharýashylyǵy taýaryn óndirýshilerge 17 myń tonna arzandatylǵan dizel otyny bólindi. Agrarlyq nesie korporatsiiasy arqyly egin jinaý jumystaryn júrgizýge jeńildetilgen nesie beriledi.
Keńeste sondai-aq malǵa jem daiyndaý barysy týraly baiandaldy. Búgingi tańda 81,7% nemese 2 mln tonnaǵa jýyq ónim jinaldy.
«Egin jinaý naýqany kúndelikti monitoringte. Jem-shóp daiyndaýdy ýaqytynda aiaqtap, egindi shyǵynsyz merziminde jinaý qajet», – dep atap ótti oblys ákimi Jeńis Qasymbek.
