Foto: ashyq derekkóz
Memleket basshysy Qasym-Jomart Toqaevtyń importty almastyrý jáne otandyq dárilik zattar óndirisiniń úlesin arttyrý jónindegi tapsyrmalaryn júzege asyrý sheńberinde Qazaqstan Respýblikasynyń Úkimeti Densaýlyq saqtaý ministrligi men «Qaraǵandy farmatsevtikalyq kesheni» JShS arasyndaǵy óndiristik qýattardy salý jáne jańǵyrtý jobasy boiynsha investitsiialar týraly kelisimdi maquldady. Tiisti qaýlyǵa Premer-ministr Oljas Bektenov qol qoidy, dep habarlaidy Ult.kz.
Jeke investitsiialardyń jalpy kólemi 42,5 mlrd teńgeni quraidy. Joba saladaǵy iri investitsiialyq bastamalardyń birine ainalady jáne farmatsevtikalyq óndiristi lokalizatsiialaýdy tereńdetýge, sondai-aq joǵary tehnologiialyq óndiristik qýattardy damytýǵa baǵyttalǵan.
Joba aiasynda dárilik zattardyń 74 ataýyn óndirý josparlanyp otyr. Óndiristik jeli meditsinanyń mańyzdy baǵyttaryn, onyń ishinde, onkologiialyq, aýtoimmýndy jáne orfandyq aýrýlardy emdeýge arnalǵan innovatsiialyq dárilik preparattardy qamtidy. Zaýyt áleýmettik mańyzy bar aýrýlardyń aldyn alý men emdeýge qajetti immýnobiologiialyq jáne basqa da joǵary tehnologiialyq preparattardy óndirýmen qatar, álemdik standarttar boiynsha belsendi farmatsevtikalyq ingredientterdiń, biologiialyq jáne biotehnologiialyq ónimderdiń sintedeýdi jolǵa qoiady. Bul farmatsevtika salasyn damytýdyń memlekettik basymdyqtaryna sáikes keledi.
Jobany júzege asyrý elimizdiń dárilik qaýipsizdigin nyǵaitýǵa jáne Qaraǵandyda 70-ke jýyq jańa jumys ornyn asha otyryp, zamanaýi farmatsevtikalyq óndiristik infraqurylymdy qalyptastyrýǵa múmkindik beredi.
Jalpy, Qazaqstannyń farmatsevtika salasy turaqty ósimdi kórsetip otyr. Ótken jyldyń qorytyndysy boiynsha farmatsevtika óndirisiniń kólemi 2024 jylmen salystyrǵanda 8,7%-ǵa artyp, 191,1 mlrd teńgege jetti, bul rette investitsiia kólemi bir jyl ishinde $91,3 mln-nan $142,8 mln-ǵa deiin ósti. 2025 jylǵy jeltoqsan aiynan bastap qazirgi ýaqytqa deiin salada jalpy somasy 360 mlrd teńgege jeti investitsiialyq kelisim jasaldy, olar 474-ke jýyq dárilik zattardyń ataýyn óndirýge jáne 1 170-ten astam turaqty jumys oryndaryn ashýǵa baǵyttalǵan.
