Foto: profbuhkz.kz
Qaraǵandy mektepterinde býhgalter jetispei jatyr. Sonyń saldarynan qaladaǵy oqý oryndarynyń birinde muǵalimder jalaqy keshiktirilip, zeinetaqy qoryna qarajat aýdarylmai jatqanyn aityp dabyl qaqty, - dep habarlaidy "Ult aqparat" KTK telearnasyna silteme jasap.
"Oqý jylynyń basynda biraz muǵalim qiyndyq kórdi. Olar ipoteka rásimdegende kelisim berilmedi. Sebebi birneshe ai zeinetaqy qoryna qarajat túspegen, iaǵni siz "jumys istemegensiz" degen siiaqty. Avtokólik ala almai, ózine qajet turmystyq zat ala almai, osyndai keleńsizdikke tap boldy", - deidi №74 orta mektebiniń muǵalimi Liliia Zárýbaeva.
Muǵalimderdiń aitýynsha, jalaqynyń únemi keshiktirilýi nesie óteýge kesirin tigizedi. Ol túgili dekret jáne eńbek demalysynyń tólemin telmire kútýge týra keledi. Ustazdar, tipti, qarajat alaiaqtyq jolmen qarjy qiturqylyǵyna aralastyrylýy múmkin dep te topshylaidy.
Degenmen sheneýnikter búgin olardy sabyrǵa shaqyrdy. Olardyń aitýynsha, zeinetaqy qoryna qaryz soma tolyq ótelgen. Tólemdi keshiktirgeni úshin tipti salyq komiteti aiyppul da salypty. Buǵan mektepterde esepshi tapshylyǵy sebep deidi. Qazir óńirde 20 mektep býhgaltersiz otyr.
"Maman tapshylyǵy jalaqy tómendiginen týyndap otyr. Esepshiniń qolyna alatyn ailyǵy - 90 myń teńge. Al atqaratyn jumys kóp. Qarajat aýdarý, muǵalimderdiń saǵatyn sanaý, kirisshyǵys esepteri. Muǵalimderge 300-den 500 myńǵa deiin aýdaryp otyryp, ózi 100 myń teńgege jetpeitin jalaqyǵa jumys istegisi de kelmeidi", - dedi Qaraǵandy bilim bóliminiń bas esepshisi Elena Raqymova.
