Qaraǵandy oblysynda 18 sáýirde saǵat 00.00-den bastap kúsheitilgen shekteý sharalary engizilýde. Keshki 22.00-den tańǵy 5-ke deiin karantin aimaǵynyń ishinde jeke kólikpen júrýge bolmaidy, dep habarlaidy "Ult aqparat".
Shekteý sharalaryn kúsheitý sheńberinde Temirtaý qalasynda jeke kólikpen júrýge tolyqtai tyiym salynady. Bul týraly Qaraǵandy oblysynyń bas memlekettik sanitarlyq dárigeri Qanat Asqarov habarlady.
«Koronavirýs dertin juqtyrǵandarǵa taldaý jasaýdyń nátijesi karantin kezeńinde tyiym salýdyń buzylatynyn kórsetedi: jappai otbasylyq, estelik, merekelik is-sharalarǵa birlesip qatysqan naýqastarmen qarym-qatynasta bolǵan adamdardyń juqtyrý faktileri tirkelgen. Qabyldanǵan sharalarǵa túsinistikpen qaraýlaryńyzdy suraimyn. Sebebi olar qazirgi epidemiologiialyq jaǵdaiǵa bailanysty», - dep atap ótti oblystyń bas sanitarlyq dárigeri.
Jańa erejeler 18 sáýir kúni saǵat 00.00-den bastap Qaraǵandy oblysynyń barlyq aýmaǵynda kúshine enedi. Jedel áreket etý ortalyǵynyń elektrondyq derekqoryna engizilgenderdi qospaǵanda, adamdar men avtokólikterdiń oblys aýdandary men qalalarynan tys jerlerge kelýine jáne shyǵýyna tyiym salynady. Oblystyń barlyq aýdandary men qalalarynyń arasynda blok beketter ornatylýy tiis.
Keshki 10-nan tańǵy 5-ke deiin karantin aimaǵynyń ishinde jeke avtokólikpen júrýge bolmaidy. Tyiym salý sharasy tótenshe jaǵdai kezeńi aralyǵynda qoldanylady.
Temirtaýda jeke avtokóliktermen júrýge tolyqtai tyiym salynady. Esterińizge sala keteiik, osyndai sheshim Shahtinsk qalasy boiynsha da qabyldanǵan. Temirtaý jáne Shahtinsk aimaǵynda óz kóligimen tek azyq-túlik, dári-dármek jáne basqa da qajetti taýarlardy jetkizetin kýrerlerge ǵana ýaqytsha júrýge ruqsat etiledi.
Barlyq qalalar men aýdandardyń turǵyndary qozǵalysyn tolyqtai doǵarýy qajet. Tek kelesi áreketterdi eseptemegende:
1) Qyzmeti ruqsat etilgen uiymdardyń qyzmetkerlerine ǵana turǵylyqty jerinen jumysqa deiin jáne keri qaitý. Bul jaǵdaida olar elektrondyq derekter bazasyna engizilýi tiis.
2) dúkenderge jáne dárihanalarǵaa turatyn jerinen bir jarym shaqyrymnan aspaityn radiýsta azyq-túlik, dári-dármek jáne meditsinalyq buiymdar satyp alý;
3) itterdi serýendetý (radiýsy - 500 metr);
4) bank operatsiialaryn jasaý;
5) shuǵyl jaǵdaida meditsinalyq mekemege barý.
65 jastan asqan adamdarǵa qajeti bolmasa dalaǵa shyǵýdy shekteý usynylady.
Veterinarlyq-sanitarlyq normalardy saqtai otyryp, maldy jaiýǵa ruqsat etilgen.
Barlyq azyq-túlik sýpermarketteri, dúkender men bazarlar 22.00-den keiin jumys istemeýi tiis.
Tegin meditsinalyq kómektiń kepildik berilgen kólemi men áleýmettik meditsinalyq saqtandyrý sheńberinde qyzmet kórsetpeitin meditsinalyq uiymdardyń qyzmeti toqtatyla turady.
Dezinfektsiia rejimi kúsheitiledi. Azyq-túlik bazarlary, jaiaý júrginshiler joldary, kólik júretin bólikter, aialdama pavilondary jáne olarǵa irgeles jatqan aýmaqtar óńdeletin bolady.
Barlyq menshik túrindegi, ónerkásiptik kásiporyndar men memlekettik mekemelerdiń basshylary múmkindiginshe qyzmetkerlerdiń jalaqysy men jumys oryndaryn saqtai otyryp, qyzmetkerlerdi qashyqtan jumys rejimine kóshirý qajet.
Mundai múmkindik bolmaǵan jaǵdaida qyzmetkerlerdi aqyly demalysqa jiberý nemese barlyq sanitarlyq-epidemiologiialyq normalardy saqtai otyryp, qyzmetkerlerdi turatyn jerinen jumys ornyna deiin jáne keri qarai ortalyqtandyrylǵan tasymaldaýdy uiymdastyrý qajet.
Oblystyń dini qaýymdaryna barlyq buqaralyq is-sharalardy tolyǵymen toqtatýdy jáne múmkindiginshe karantin ýaqytyna keletin mańyzdy dini datalardy onlain rejimde merekelep, ótkizý usynyldy.
«Saiajailar máselesi qazir qarastyrylýda, biraq kóptegen syn-qater bar. Jaqynda Almaty oblysyndaǵy tórt saiajai aýyly karantinge jabyldy, onda toǵyz koronavirýsty infektsiia oqiǵasy anyqtaldy. Baǵbandardyń negizgi bóligi - egde jastaǵy adamdar, aýrý juqtyrý qaýpine beiim zeinetkerler. Esterińizde bolsyn, kóp nárse sizderdiń árqaisyńyzdyń jaýapkershiligińizge bailanysty. Ózińizge qaýip tóndirgennen góri saiajai maýsymyn keshirek bastaǵan durys», - dedi Qanat Asqarov.
Oblystyń barlyq karantindik qalalary men aýdandarynda patrýlder kúsheitiledi. Politseiler karantindik aimaqtyń perimetri boiynsha táýlik boiy kezekshilik etedi. Saiabaqtar men gúlzarlarda patrýldeý júrgiziledi. Tártip saqshylary karantin erejelerin buzýshylarǵa ákimshilik shara qoldanýǵa quqyly.
