Qaraǵandy oblysynyń elektr stansalary kómir men mazýttyń qajetti qorymen qamtamasyz etilgen. Óńirde biylǵy jylytý maýsymyna daiyndyq jaily óńirlik kommýnikatsiialar qyzmetiniń alańynda ótken brifingte energetika jáne TKSh basqarmasy basshysynyń orynbasary Nurjan Naqypbekov aityp berdi, dep habarlaidy QazAqparat.
Qaraǵandy óńiriniń jeti elektr stantsiiasynda jetkilikti otyn qory bar. Qoimalarda 1 mln 90 myń tonnadan astam kómir jáne 21 myń tonna mazýt daiyndalǵan.
Qazirgi ýaqytta oblysta kómir satatyn 33 núkte jumys isteidi. Qatty otyndy jetkizý maýsym aiynda bastaldy.
Onyń ishinde halyqtyń qajettiligi úshin kómir jetkizilip jatyr.
Sondai-aq, barlyq iri energiia kózderinde negizgi jabdyqtardy jyl boiy jóndeý jumystary júrip jatyr. 32 qazandyq pen 19 týrbinada jóndeý jumystary aiaqtaldy.
Jóndeý protsesinde 8 qazandyq pen 5 týrbina qalady.
Mamyrdan qazanǵa deiin aimaqtyń jabdyqtary men jelilerin daiyndaý jumystary júrgizildi.
«7 stantsiia, 680 jergilikti qazandyq, 570 elektr qosalqy stantsiia jáne 2 myń shaqyrymnan astam injenerlik jeliler, onyń ishinde jylý, sý jáne elektr jelileri jabdyqtaryn daiyndaý oryndaldy. 1126 áleýmettik nysan men 5,5 myń kópqabatty úi daiyndaldy», – dedi Nurjan Naqypbekov.
Iri jobalarda jumys jalǵasady. Kelesi jyly Qaraǵandyda JEO-3-te úshinshi jylý taratqyshtyń qurylysy aiaqtalýy tiis.
Búgingi tańda 7 myń shaqyrym qubyr tóseldi. Bolashaqta osy stantsiiadan Ońtústik-Shyǵysta belsendi salynyp jatqan shaǵyn aýdandar jylýmen qamtamasyz etiledi.
Balqashta 1-shi jáne 2-shi jylý magistraldary boiynsha iri joba qolǵa alynǵan. Olar qala tutynýshylarynyń basym bóligin jylýmen qamtamasyz etip otyr.
Jóndeý jumystaryn kelesi jyly aiaqtaý josparlanǵan.
Qurylys-montaj jumystary Sarandaǵy qazandyqta da júrip jatyr. Olar aiaqtalǵannan keiin 2023 jyly turǵyndar ortalyqtandyrylǵan jylýmen qamtamasyz etiledi.
