Qaraǵandyda dezinfektsiia jumystary jalǵasýda. Bul sharany Qaraǵandy garnizonynyń eriktileri men áskeri qyzmetshiler júrgizedi, dep habarlaidy "Ult aqparat" oblys ákimdiginiń resmi saityna silteme jasap.
Búgin búrikkishtermen Buqar jyraý, Núrken Ábdirov dańǵyldary jáne Álihanov, Erýbaev kósheleri óńdeldi. Atalmysh jumystarǵa bes avto búrikkish stantsiiasy, úsh órt sóndirý avtotsisternalary jumyldyryldy.
Qaraǵandy kóshelerine kúnine 200-den astam dezinfektor shyǵady. Olar 8,5 mln sharshy metrge jýyq qoǵamdyq aýmaqty óńdedi. Buǵan 62 tonnadan astam dezinfektsiialyq eritindi qoldanyldy. Sanitarlyq óńdeý turǵyn úilerdiń aýlalarynda, balalar alańdarynda, jaiaý júrginshiler joldarynda, aialdama pavilondarynda jáne Oktiabr aýdany men Qazybek bi atyndaǵy jol bólikterinde ótedi.
Zapastaǵy áskeri mindettiler arasynan jinaqtalǵan eriktiler tobyn búrikkishtermen jumys isteýge jibermes buryn, olar úsh kúndik oqý kýrsynan ótti. Dezinfektorlardyń qosymsha qaýipsizdigi úshin olarmen birge dárigerler brigadasy erip júredi. Kúnine úsh ret barlyq qyzmetkerlerdiń temperatýrasy ólshenedi. Eriktiler men áskeri qyzmetshilerdi jumys oryndaryna arnaiy avtobýstarda jetkizedi, olardy árbir reisten keiin zalalsyzdandyrady. Jumysqa tartylǵandar «Patriot» qorǵanysh kostiýmderimen, respiratorlarmen jáne aspaly búrikkishtermen qamtamasyz etilgen.
- Mine, arqamyzǵa osylai 25 kg júk tieimiz. Ony asyp alamyz da, kúni boiy júremiz. Barlyǵymyzdy jaqsy jabdyqtaǵany qýantady. Biraq árine jigitter sharshaidy. Aiaqtary qajalady, biraq ol qalypty jaǵdai. Kúnine biz 20 shaqyrymnan astam júrip shyǵamyz, - deidi zapastaǵy aǵa leitenant «Jas Sarbaz» qozǵalysynyń tóraǵasy Rýstam Janaliev.
Aspaly búrikkishtegi hlorly eritindiniń qory 100 metrge jetedi. Kúnine 20 adamnan turatyn brigada 2,5 tonna dezinfektsiialaý quraldaryn jumsaidy.
- Qala turǵyndary túsinistikpen qaraidy. Biz aýlalarǵa jumys isteýge barǵanymyzda qaraǵandylyqtar terezeden bizge qol shapalaqtaǵan sátter boldy. Olar bizdiń jumysymyzdyń mańyzdylyǵyn túsingeni óte qýantady, - dedi «Astana» óńirlik qolbasshylyǵy qolbasshysynyń orynbasary Qanat Daiyrov.
Ol sondai-aq dezinfektsiialaý sharalarynyń tiimdiligi qala turǵyndarynyń karantindi qanshalyqty qatań saqtaýyna tikelei bailanysty ekenin atap ótti.
