Qaraǵandy qalasynyń ákimdigi Oktiabr aýdanyn Álihan Bókeihan atyndaǵy aýdan dep qaita ataý jóninde Qaraǵandy qalalyq máslihatyna usynys engizdi. Osyǵan orai qoǵamdyq keńes uiymdastyrylyp, oǵan 700-ge jýyq adam qatysty. Jinalǵandardyń basym bóligi aýdannyń qaita atalýyn qoldady, dep habarlaidy "Ult aqparat".
2021 jylǵy 12 naýryzda Qaraǵandy qalalyq máslihaty aýdandy qaita ataý boiynsha Jariia tyńdaýlar ótkizdi.
Qoǵamdyq tyńdaýlarǵa qalalyq máslihat depýtattary, Qaraǵandy qalasynyń Qoǵamdyq keńes músheleri, qala turǵyndary, BAQ ókilderi qatysty.
Qaraǵandy oblysynyń bas memlekettik sanitarlyq dárigeriniń 9 naýryzdaǵy № 6-q qaýlysyna sáikes sanitarlyq normalardy qamtamasyz etý úshin Maiqudyq, Suryptaý jáne Prishahtinskidegi 10 obektide Jariia tyńdaýlar ótkizildi. Alaida, niet bildirýshiler kóp bolǵany sonshalyq, mikrofondar men ekrandar ornatylǵan qosymsha alańdar uiymdastyryldy. Barlyǵy 15 zal boldy.
Barlyq alańdarda 685 qaraǵandylyq qatysty. Aldyn ala málimetter boiynsha, kópshilik Oktiabr aýdanynyń ataýyn ózgertýdi qoldap, daýys berdi.
«Aýdannyń ataýyn ózgertý – bul ideologiia, rýhaniiat máselesi. Biz sanamyzdy jańartyp, aldymyzǵa jańa maqsattar men mindetter qoiýymyz kerek», - dedi qalalyq máslihat depýtaty Berik Qulmaǵanbet.
«Qoǵamdyq tyńdaýlardyń qorytyndysy boiynsha qalanyń Oktiabr aýdanyn Əlihan Bókeihan atyndaǵy aýdan etip ózgertý týraly usynys biraýyzdan qoldaý tapty degen habardy men zor qýanyshpen qabyldadym! Barlyq qaraǵandylyqtardy osy aitýly oqiǵamen quttyqtaimyn!», - dep jazdy Facebook-tegi paraqshasynda qala ákimi Ermaǵanbet Bólekbaev.
«Ákimdik tiisti qaýly shyǵarady, máslihat talqylaidy jáne sheshim shyǵarady. Budan ári qujattar Respýblikalyq onomastikalyq komissiiaǵa jiberiledi. Osy organmen kelisim boiynsha olar qaitadan oblys ákimdigine jiberiledi, oblystyq máslihatta qaralady jáne ádilet organdarynda tirkeledi. Sheshim jariialanǵannan keiin on kún ótken soń kúshine enedi», - dep túsindirdi qalalyq máslihat hatshysy Qudaibergen Beksultanov.
Ótkizilgen kópshilik tyńdaýlardyń hattamasy 7 jumys kúni ishinde Qaraǵandy qalalyq máslihatynyń, Qaraǵandy qalasy ákimdiginiń internet-resýrsynda ornalastyrylady jáne qala aýmaǵynda taratylatyn BAQ-ta jariialanady.
Sondai-aq Oktiabr aýdanyn Álihan Bókeihan atyndaǵy aýdan dep qaita ataý máselesi Qaraǵandy qalalyq máslihaty sessiiasynyń kún tártibine engiziletin bolady.
