Biyl qara metallýrgiia salasynda eksporttyq áleýeti 3 mlrd dollar bolatyn jobalar iske qosylady.
Bul týraly búgin Úkimet otyrysynda QR Indýstriia jáne infraqurylymdyq damý ministri Qaiyrbek Óskenbaev aitty, dep habarlaidy QazAqparat.
«2022 jyldyń negizgi jobalaryn atap ótsem. Olar: Atyraý oblysynda propilen óndiretin zaýyt salý; Qaraǵandy oblysynda avtomobil shinalaryn jasaityn zaýyttyń qurylysy; Aqmola oblysyndaǵy altyn óndirý fabrikasy men Túrkistan oblysynda munai óńdeitin zaýyttyń qurylysy. Sondai-aq Shymkent qalasynda aliýminii bankilerin óndirý boiynsha joba iske qosylady. Sonymen birge Shyǵys Qazaqstan oblysynda - mai ekstraktsiialyq zaýyty; Jambyl oblysynda - mineraldy tyńaitqyshtar óndirisin keńeitý josparlanýda. Almaty qalasynda aliýminii jáne bimetall radiatorlarynyń óndirisi iske qosylady», - dedi ministr.
Onyń atap ótýinshe, qara metallýrgiia salasyndaǵy aldyńǵy qatardaǵy jobalardyń tizimine 4 jańa bolat quiý zaýyty, 2 jartylai koks óndirý zaýyty jáne 5 ferroqorytpa zaýytyn iske qosý kiredi. Jobalardy iske qosý 1,2 mlrd AQSh dollary kólemindegi importty almastyrýǵa, sonymen birge 3 mlrd AQSh dollary somasyna eksportqa shyǵarýǵa baǵyttalǵan.
«Tústi metallýrgiia salasynda 2025 jylǵa deiin 11 negizgi jobany iske asyrý josparlanyp otyr. Aliýminiiden ónim óndirý boiynsha 6 negizgi jobany júzege asyrý josparlanýda. Bul eksport kólemin 645 mln AQSh dollaryna arttyrýǵa múmkindik beredi. Mystan daiyn buiymdar shyǵaratyn 3 zaýyttyń qurylysy josparlanýda. Bul da eksport kólemin 200 mln AQSh dollaryna ulǵaitýǵa múmkindik ashady», - dedi ol.
