Qaraǵandy oblysy ákiminiń nazaryna!
Qaraǵandy oblysyna qarasty Búrkitti aýylynyń biylǵy qystan áýre-sarsańmen ótip jatqanyn qalyń qazaq biledi. Áleýmettik jelide taraǵan videojazbalardy kórgen halyq biraz ýaqyt shýlap, keibireýi arnaiy másele ǵyp ta kótergen. Sózdi estip, mán bergen shendilerdi baiqamadyq. Oblys hám aýyl ákimdikteri tarapynan aqparat quraldaryna resmi jaýap ta berilmedi.
Qarqaraly aýdanynyń quramyndaǵy bul aýyldy tonnalap túsken qar aptalap soqqan borannyń kúshimen úilerdiń shatyryna deiin basyp qalǵan edi. Turǵyndar úilerine kirýi úshin úńgir jasap, týnnel arqyly ótýge májbúr bolǵan. Aýyl aqsaqaldary mundai qardyń bul óńirde 40-50 jyl buryn ǵana jaýǵanyn aityp, zar jylaǵan-tyn.
«Biz ózimizdi «úńgir adamdary» dep ataimyz. Sebebi olardan esh aiyrmashylyǵymyz joq. Úige kirgende úńgirge kirgendei bolamyz. Qolymyzdan kúrek túspeidi, kún saiyn qar tazalaimyz, úiemiz, syrtqa shyǵaramyz. Qys boiy «shyqpa janym, shyqpa» dep otyrǵan jaiymyz bar. Kúnde tańerteń qorqynyshpen oianamyz. Arshyp qoiǵan týnnelimizdi qar basyp qalǵan shyǵar, úiden dalaǵa shyǵa almai qalsaq ne bolady degen oilar mazamyzdy alady. Úige kirgenge deiin balalardy qar basyp qala ma dep qorqyp otyramyz. Mal baǵý da qiyndap ketti. Týnnel bolyp arshylǵan qardyń ortasynan úi janýarlary qoraǵa ótkileri kelmei, dalaǵa qashady. Al, qoradan shyqqan mal qardyń ústimen júrip, keide tipti shatyrǵa da shyǵyp ketedi» dep tolǵanǵan aýyl turǵyndarynyń zaryn kim estidi?..
Olardyń búgingi hali qalai, jaǵdaiy neshik? Eki ai jatqan qar nópir sýǵa ainalyp, qara halyqtyń basyna kesapat bop kelgen joq pa? Álde biliktegiler kómek qolyn sozyp, qiyn jaǵdaida janashyrlyq tanytty ma? Qyzylaǵash oqiǵasynyń qaitalanbasyna kim kepil? Osy suraqtar bárimizdi de mazalaidy...
Erimbet Muhtar
