Ekologiia, geologiia jáne tabiǵi resýrstar ministrligi Almaty oblysy Qapshaǵai qalasyndaǵy «Kaz Organic Product» tsikldy balyq óndirisi keshenine baspasóz týryn ótkizdi. Kásiporynnyń ereksheligi - ekologiiaǵa ziian keltirmeitin óndiris tsikly jasalǵan, balyqqa arnalǵan azyq pen otyrǵyzý materialdary keshenniń óz ishinde daiyndalady.
Joba azamattardyń ómir sapasyn jaqsartý faktory retinde QR óndiristik qaýipsizdik baǵdarlamasyna tolyq sáikes keledi.
BAQ ókilderi kásiporyndy aralap, afrikalyq klariýs, tilapiia jáne avstraliialyq qyzyl shymshýyrly shaiandy jabyq sýda ósirý protsesimen tanysty. Naryqqa shyǵarylatyn qaita óńdelgen balyq ónimderi kórsetildi.
Kásiporyn basshysy Aleksei Shetinin zaýyttyń qýaty jylyna tiri jáne qatyrylǵan 10 myń tonna balyq óndirýge jetetinin atap ótti. Zaýyttyń ereksheligi sol, basseinde balyqty 6 aida dernásilden bastap 1 kg taýarlyq salmaqqa deiin ósirip, 1 jylda eki ret ónim alýǵa bolady.
«Qazir Úkimet halyqtyń kóbirek balyq ónimderin tutynýyna kóńil bólýde. Bul óndiris qýatyn arttyrýǵa áserin tigizedi. Tiri balyqty da, qaita óńdelip uzaqqa saqtaýǵa arnalǵan ónimdi de kóbeitý kerek. Biz óndiriske akvamádeniettiń 10-ǵa jýyq zamanaýi túrin engizdik. Mármár klariýsyn, tilapiia jáne avstraliialyq shaian ósirýdemiz. Biyl 2000 tonna ónim ótkizýdi josparlaǵanbyz. Pandemiiaǵa josparymyzǵa azdap ózgeris engizdi», - dedi A. Shetinin.
Onyń sózinshe, 70 adam jumys isteitin zaýytta qoldanylatyn zamanaýi tehnologiialar men kún saiyn sýdyń ekspertizasyn ótkizetin zerthana ónimniń ekologiialyq taza bolýyn qamtamasyz etedi.
«Ónim satylmas buryn ózimizde jáne qaladaǵy zerthanada tekseriledi. Jemdi Qazaqstanda jasalǵan taza ingredientterden ózimiz daiyndaimyz», - dedi ol.
Maman Qazaqstan sý resýrstarynda jyl saiyn 600 myń tonna balyq ósirý úshin akvamádenietti qarqyndy damytý qajet dep sanaidy.
«Búgingi tańda Úkimet ár aimaqta balyq sharýashylyǵy boiynsha negizgi problemalar men usynystardy jinaýda. Sonyń negizinde balyq óndirýshilerdi qoldaý boiynsha Zańdarǵa ózgeris engizilý kerek. Aita ketetin bir problema - salada maman jetispeidi. Biz óz qyzmetkerlerimizdi shetelde oqyttyq. Endi institýttarmen bizde jastardyń tájiribe almasýy jóninde, birlese maman daiyndaý boiynsha kelisip jatyrmyz», - dep aitty kásiporyn basshysy.
Kásiporyn ónimderi ishki naryqtan bólek Reseige eksporttalady.
«Qazaqstandyq ónim tabiǵi taza, himiialyq qospasy joq bolǵandyqtan Resei joǵary baǵalaidy. Sondyqtan halyqaralyq naryqta da uialmai maqtana alamyz. Balyqtyń 15 túrli ónimin daiyndaimyz. Klariýstyń ereksheligi - ony allergiiasy bar adamdarǵa da jeýge bolady. Pandemiia kezinde koronavirýspen aýyrǵan adamdar jatqan aýrýhanalardyń ratsionyna enip, biz balyq jetkizip turdyq», - dep atap ótti kásiporynnyń qoǵammen bailanys menedjeri.
Eske salsaq, Memleket basshysy Qasym-Jomart Toqaev halyqqa joldaýynda balyq sharýashylyǵyna erekshe mán berý kerektigin aitqan. 2019 jyly elimizdiń balyq jáne balyq ónimderi naryǵynyń jalpy kólemi 66 myń tonnany qurady. Qazaqstandaǵy sý resýrstary 600 myń tonnaǵa deiin balyq ósirip, eksportty 10 esege arttyrýǵa múmkindik beredi.
Sol sebepti qazir Ekologiia ministrligi sharýalardy qoldaý maqsatynda birqatar zańdarǵa ózgeris engizip, sýbsidiia berý joldaryn qarastyryp jatyr.
