Kámelet jasyna tolmaǵan eki birdei balasynan aiyrylyp, Jámilá qaiǵydan bas kótere almai júr. Qapshaǵai sý qoimasyndaǵy qaiǵyly jait jalǵyzbasty ananyń emis-emis esinde. Sebebi 12 men 15 jastaǵy eki ulyn qutqaramyn dep jantalasqan kelinshektiń ózi de sýǵa batyp kete jazdaǵan.
"Men inim Armannyń kómek surap aiǵailaǵanyn estidim. Onyń janynda eki ulym boldy. Olardyń sýǵa batyp bara jatqanyn kórip qalai júgirgenimdi baiqamadym. Bir ýaqytta ózim de sýǵa kirip, shyǵa almai jattym. Esimdi jisam jaǵalaýda otyr ekenmin. Birden balalarymdy izdedim. Biraq barlyǵy tym kesh edi. Ol jer taiaz bolatyn. Alaida ekiúsh qadamnan keiin shuńqyr bar. Sonyń kesirinen batttyq", - deidi Jámilá Sabyrjanova.
Jetkinshekterdi sýdan alyp shyǵýǵa umtylǵan Jámilániń 30 jastaǵy týǵan inisi men 32 jastaǵy sińilisi de ajal qushty. Olardyń óli denesin tolqyn jaǵaǵa bir-aq shyǵarǵan. Al mektep oqýshylaryn súńgýiler sý astynan úsh saǵatta áreń taýypty. Nemereleri men balalarynyń janushyra shyqqan daýsyn estip sýǵa sekirip ketken Sáliia ájei sol kúndi qorqynyshty tústei esine aldy.
"Qapshaǵaiǵa biz eki kólikpen bardyq. Balalardy qosqanda 13 adambyz. Bizge tolqyn men úlken shuńqyr bar ekenin eskertken tiri jan bolmady. Adamdar eminerkin sýǵa túsip júrdi. Men de bir ajaldan aman qaldym. Ainaldyrǵan 15 minýttyń ishinde abyr-sabyr bolyp ketti. Meni qaita bir jigit qutqaryp shyqty. Jaǵajaiǵa kirý úshin bizden aqsha aldy ma, barlyǵy qaýipsizdik talaptaryna sai bolsyn. Kásipkerdiń qatań jazaǵa tartylǵanyn suraimyn", - deidi Sáliia.
Bir apta buryn qaiǵyly oqiǵa bolǵan demalys orny jabyq tur. Osy demalys aimaǵyna kirý úshin ár kólik úsh myń teńgeden tóleýi tiis. Alaida aqyly jaǵalaýda shomylýǵa eshqandai jaǵdai jasalmaǵan. Munda qutqarýshylar da, tyiym salý belgileri de múldem joq.
"Qapshaǵai sý qoimasynda oqys oqiǵa oryn alǵan jer ýchaskesi «Indeksi» JShSne tiesili. Jer ýcheskesiniń paidalaný maqsatyndaǵy sanatyndaǵy jerler bolyp esepteledi. Kólemi 24 gektar. Atalǵan jerge demalys bazasyn uiymdastyryp, demalýshylarǵa aqyly túrde qyzmet kórsetýge tyiym salynady. Qazir endi Almaty oblystyq jer resýrstaryn basqarý departamentimen birigip komissiia qurylyp, osy ýchastik jóninde tekserý jumystary uiymdastyrylatyn bolady", - deidi Qonaev qalasy Aýyl sharýashylyq jáne jer qatynastar bóliminiń basshysy Raýan Jamaǵatov.
Aǵaiyndylar aǵyp ketken demalys aimaǵynyń qojaiyny búgin óz ornynda joq. Ol oqys oqiǵa bolǵan kúni de suhbat berýden bas tartqan bolatyn. Al aýyr qazadan áli kúnge deiin eseńgiregen kúii otyrǵan tutas bir áýlettiń músheleri politsiia men prokýratýraǵa aryz jazbaqshy. Aita keteiik, Qapshaǵai sý qoimasynda shomylýǵa resmi ruqsat etilgen jeti jaǵalaý bar. Biraq adamdar kóbine jabaiy jaǵalaýlarda sýǵa batyp ketip jatyr. Tótenshe jaǵdai departamentiniń málimetinshe, jaz bastalǵaly Jetisý men Almaty oblystarynda jeti adam sýǵa ketken, onyń ekeýi bala.
