Foto: Sý resýrstary jáne irrigatsiia ministrligi
Almaty oblysyndaǵy Qapshaǵai sý qoimasy sońǵy 10 jylda alǵash ret 18 mlrd tekshe metrden artyq sý jinap, 100%-ǵa toldy. Sý qoimasy Qytai aýmaǵynan bastaý alatyn transshekaralyq Ile ózeniniń sýyn jinaidy. Biyl kóktemde sekýndyna 900 tekshe metrge deiin sý kelgen. Mamandar munyn sebebin Tian-Shan muzdyqtarynyń erýi men jaýyn-shashynnyń kóp bolýymen bailanystyrady, dep habarlaidy «Ult aqparat» QR Sý resýrstary jáne irrigatsiia ministrligine silteme jasap.
"Qapshaǵai sý qoimasy sońǵy ret 2014 jyly 100%-ǵa tolǵan bolatyn. Sýarý maýsymy bastalǵaly Sheńgeldi alqabynyń 6 myń gektar jáne Aqdala alqabynyń 28 myń gektar jerine sý berilýde. Búgingi tańda sharýalardyń suranysy boiynsha sekýndyna 750 tekshe metr sý jiberilip jatyr",- dedi Balqash-Alakól basseindik inspektsiiasy basshysynyń orynbasary Medet Kerimjanov.
Qazir Qapshaǵai sý qoimasynda 16 mlrd 200 mln tekshe metr sý bar. Oblysta vegetatsiia kezeńi qyrkúiektiń sońyna deiin jalǵasady. Odan keiin sý tasqyny kezeńine daiyndyq bastalady.
Sý resýrstary jáne irrigatsiia ministrligi Qazaqstan men Qytai arasyndaǵy transshekaralyq ózenderdiń sýyn bólý máselesi boiynsha úkimetaralyq kelisim jobasyn ázirlep jatyr. Onyń ishinde úsh iri transshekaralyq ózen: Ertis, Ile jáne Emel bar. Búginde taraptar sý bólý máselesi boiynsha kelisimniń birqatar baptary boiynsha ortaq mámilege keldi.
