Qapshaǵai kólinde daýyl kezinde jaǵaǵa jete almaǵan balyqshylar qutqaryldy, dep habarlaidy "Ult aqparat".
«22 qańtar kúni Almaty oblystyq TJD Qapshaǵai óńiriniń Jedel-qutqarý jasaǵynyń qutqarýshylary patrýldeý kezinde jaǵalaýdan úsh shaqyrym jerde qalǵan balyqshylardy qutqardy. 4 adam muz oiyǵynan balyq aýlap júrgen. 65, 45, 44 jáne 36 jastaǵy er adamdar (Qapshaǵai jáne Almaty qalalarynyn turǵyndary) qatty jelde jaǵaǵa jete almaǵan»,- delingen Almaty oblystyq TJD baspasóz qyzmetiniń habarlamasynda.
Vedomstvonyń aqparatyna sáikes, qutqarýshylar «Slavir-9Ý» aýa jastyqshasy bar arnaiy keme kómegimen azamattardy jaǵaǵa evakýatsiialady.
Esterińizge sala keteiik, 20 qańtarda Almaty oblysy TJD SMS habarlama, «Dármen» mobildi qosymsha jáne buqaralyq aqparat quraldary arqyly 22-23 qańtarda Almaty oblysynyń kei jerlerinde qatty jaýyn-shashyn (jańbyr, qar), boran, tuman, kóktaiǵaq bolatynyn eskertti. 22 qańtarda kúndiz jáne 23 qańtarda túnde jel soltústik batystan ońtústik batysqa aýysyp, 15-20 m/s, kei jerlerde ekpini 23-28 m/s jetedi, tipti 30 m/s asyp ketetindikten daýyldy eskertýi jariialandy.
Almaty oblysynyń TJD azamattardy aýa raiynyń ózgerýin baqylap, daýyl kezinde alys jolǵa jáne muz ústine shyqpaýǵa shaqyrady.
