Biýdjet qarajatyn igermegeni úshin Qapshaǵai qalasynyń ákimine qatań sógis jariialandy, dep habarlaidy "Ult aqparat".
Oblystyq ekonomika jáne biýdjettik josparlaý basqarmasynyń basshysy J. Ámirhanovtyń aitýynsha, jalpy óńirde ekonomikanyń barlyq baǵyttary boiynsha ósim baiqalady. Ónerkásip ósimi qarqyn alyp, 104,5 % qurady.
Aýyl sharýashylyǵy óniminiń jalpy kólemi 718 mlrd. teńgeden asyp, ósim 2,6 %-ke jetti. Sol siiaqty bólshek saýdadaǵy taýar ainalymynyń kólemi de 3,8 % ósti. Degenmen qurylys sektorynyń qarqynynda baiaýlaý baiqalady, iaǵni 214,4 mlrd. teńge - 100,6 %. Investitsiia boiynsha da azdaǵan ósim bar – 100,5 %, 444,2 mlrd. teńge tartylǵan.
Bul rette Amandyq Batalov igerilmei jatqan qarjynyń edáýir bóligi osy qurylys salasynda ekenin aitty. Máselen, Qapshaǵai qalasynyń ózinde ǵana qazirgi kezde 741 mln. teńge igerilmegen, onyń 517 mln. teńgesi respýblikalyq biýdjetten bólingen. Osy somanyń basym bóligi kóp qabatty úilerdiń qurylysyna qarastyrylǵan. Merdiger kompaniialar tarapynan qurylys jumystary júrgizilip jatyr, dese de iske qosý merzimi josparlanǵannan keshiktirilýi ábden múmkin.
«Memleket halyqty baspanamen qamtamasyz etý úshin tiisti qarjy bóldi. Al sender ony merziminde oryndamai, qarajattyń igerilmeýine jol berip otyrsyńdar. Men muny Qapshaǵai qalasy ákiminiń, oblystyq qurylys basqarmasy basshysynyń jáne qurylys salasyna jetekshilik etetin meniń birinshi orynbasarymnyń tikelei kinási dep esepteimin. Osy atalǵan barlyǵyńa qatań sógis jariialaimyn. Turǵyn úi salýǵa jaýapty merdiger uiymdardy da qurylys jumystaryn keshiktirgeni úshin jazalaý kerek. Jyl sońyna deiin jaǵdaidy túzeitin bolyńdar, qurylys jumystary qatań baqylansyn», - dedi A. Batalov
Almaty oblysynyń ákimi Amandyq Batalov biýdjet qarajatynyń igerilýi boiynsha barlyq qajetti sharalardy qabyldaýdy tapsyrdy. Oblys basshysy ótken 10 aidyń qorytyndysy boiynsha maqsatty indikatorlarǵa qol jetkizý jónindegi máseleler talqylanǵan jiynda biýdjettiń igerilmeýine jergilikti atqarýshy organdar basshylarynyń derbes jaýap beretinin eskertti.
