Ishki ister ministrligi tergeý departamentiniń basshysy Sanjar Ádilov Túrkistan oblysy áskeri bólimdegi qarý-jaraq urlaný faktisiniń mán-jaiyn aityp berdi, dep habarlaidy QazAqparat.
«Belgili bir ýaqyt boiy qarý jymqyrý faktisi oryn alyp kelgen. Ulttyq qaýipsizdik komiteti men prokýratýranyń shuǵyl tergeýi osy jaǵdaidy anyqtady. Urlanǵan qarý-jaraq tárkilendi. Barlyq qarý birden qoldy bolmaǵan. Qańtar aiynyń sońynan aqpannyń ortasyna deiin urlyq jasalyp kelgen. Qarý saqtaý kamerasyna joly ashyq ekenin paidalanyp, ol jasyryn túrde ár joly 1-2 qarýdan jymqyryp otyrǵan. Al avtomattardy urlaǵan kezde dostaryn, azamattyq tulǵalardy shaqyrǵan. Iaǵni, urlanǵan qarýdyń negizgi bóligi, avtomattar 19 aqpan kúni shyǵarylǵan», – dedi Sanjar Ádilov Úkimet otyrysynan keiin tilshilerge.
Onyń aitýynsha, kúdikti eki tapanshany 120 myń teńgeden satyp úlgergen.
«Bul jaidy birden anyqtap, tárkiledik. Qalǵan qarýdy ol dostarynyń úiinde saqtap otyrǵan. Laýazymdy tulǵalar qarýdy saqtamaǵany úshin, ýaqtyly baqylaý júrgizbei, qyzmette salǵyrttyq tanytqany úshin qylmystyq jaýapqa tartylady. Iaǵni ózderiniń fiýnktsionaldyq mindetterin laiyqty oryndamaǵan. Diviziia komandiri, jedel kezekshi men kelisimshart boiynsha qatardaǵy jaýynger ustaldy. Qazir olar áskeri qyzmet atqarý erejesin buzǵany úshin, qarý urlyǵyna ákep soqqan salǵyrttyǵy úshin qamaýda otyr», – dedi ol.
