Qańtar oqiǵasyna qatysty 10,5 myń adamnan kýágerler men jábirlenýshiler retinde jaýap alyndy. Bul týraly QR IIM Tergeý departamentiniń bastyǵy Sanjar Ádilov aitty, dep habarlaidy QazAqparat.
«Ishki ister organdarynyń tergeýshileri arnaiy prokýrorlarmen tyǵyz is-qimyl jasai otyryp, qańtar oqiǵalarynyń sebepterin anyqtaý, qylmys izderin alý jáne bekitý, sondai-aq qajetti dáleldemeler bazasyn jinaý jumystaryn jalǵastyrýda. Bul jumysqa barlyǵy 200-den astam tergeýshi tartylǵan.
Buryn habarlanǵandai, qazirgi ýaqytta barlyq zaqymdanǵan nysandy tekserý aiaqtaldy. Olardyń sany 1,5 myńnan asady jáne 760-tan astam avtokólik bar», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, 1,7 myńnan astam sot saraptamasy taǵaiyndaldy. Kýágerler men jábirlenýshiler retinde 10,5 myń adamnan jaýap alyndy.
«Júrgizilip jatqan jumystardyń nátijesinde qylmyskerler men jasyrý oryndarynan 828 birlik qarý, 18 myńnan astam oq-dári jáne 286 arnaiy qural tárkilendi. Sonymen qatar, 65 dana qarý erikti túrde tapsyryldy», - dedi Sanjar Ádilov.
