Qańtar oqiǵasy kezinde tártipsizdiktiń bolýyna múddeli toptardyń bolǵany jáne olardyń osy maqsatta jumys istegenine kózimiz jetti. Bul týraly belgili advokat Abzal Quspan aitty, dep habarlaidy QazAqparat.
«Sońǵy birneshe apta kóleminde, komissiia («Amanat» komissiiasy) óńirlerge shyqpai-aq, óz jumysyn ortalyq memlekettik jáne quqyq qorǵaý organdary arqyly, júieli túrde atqarýǵa kóshkenine nazarlaryńyzdy aýdaramyn. Osy atqarylǵan jumystar, respýblika kóleminde sol «qańtar oqiǵalary» boiynsha jalpy kartinany bilýge jáne oǵan qatysty quqyq qorǵaý organdary tarapynan atqarylǵan jumystar men olardyń qyzmetindegi birqatar kemshilikter men jetistikteri týraly aldyn ala qorytyndy jasaýǵa múmkindik beredi. Birinshiden, qoǵamdy mazalaityn eń mańyzdy suraqtardyń biri – «Qańtar oqiǵasy» siiaqty qandy qyrǵyn qalai boldy? Terrorizm boldy ma? Ony uiymdastyrýshylar boldy ma?» degen maǵynada, sol sebepti osy máseleler boiynsha qysqasha toqtalyp keteiin», - dedi Quspan Májilistiń jalpy otyrysynda.
Onyń aitýynsha, barlyq óńirde sol jappai tártipsizdkke qatysýshylarmen bolǵan kezdesý nátijesinde bárine birdei ortaq, mynadai belgileri bary anyqtaldy:
- Jappai tártipsizdiktiń bir kezeń, bir ýaqyt aralyǵynda bastalýy;
- Arandatýshy toptyń bolýy, olardyń ortaq, bir talaptarynyń bolýy, mysaly, barlyq jerde de beibit mitingige shyqqan kópshilikti oblys, qala ákimshiligin basyp alýǵa úgitteýshilerdiń bolǵany;
- Jekelegen jaǵdaida, quqyq qorǵaý organdarynyń ýaqytyly qimyldamaýy, keide múldem áreketsizdik tanytýy;
- Ońtústik óńirlerde, beibit mitingige qatysýshylar buryn ózderi kórmegen, tanymaityn áskeri tártipti, belgisiz adamdardyń bolǵany t.b.
«Bul jaǵdailar, áý basta beibit bastalǵan mitingilerdi jappai tártipsizdikke ulastyrýǵa múddeli toptardyń bolǵany jáne olardyń ortalyqtandyrylǵan túrde, maqsatty jumys istegenine bizdiń kózimizdi jetkize tústi», - dedi Abzal Quspan.
