قاڭتار وقيعاسى كەزٸندە تەرتٸپسٸزدٸكتٸڭ بولۋىنا مٷددەلٸ توپتاردىڭ بولعانى جەنە ولاردىڭ وسى ماقساتتا جۇمىس ٸستەگەنٸنە كٶزٸمٸز جەتتٸ. بۇل تۋرالى بەلگٸلٸ ادۆوكات ابزال قۇسپان ايتتى, دەپ حابارلايدى قازاقپارات.
«سوڭعى بٸرنەشە اپتا كٶلەمٸندە, كوميسسييا («امانات» كوميسسيياسى) ٶڭٸرلەرگە شىقپاي-اق, ٶز جۇمىسىن ورتالىق مەملەكەتتٸك جەنە قۇقىق قورعاۋ ورگاندارى ارقىلى, جٷيەلٸ تٷردە اتقارۋعا كٶشكەنٸنە نازارلارىڭىزدى اۋدارامىن. وسى اتقارىلعان جۇمىستار, رەسپۋبليكا كٶلەمٸندە سول «قاڭتار وقيعالارى» بويىنشا جالپى كارتينانى بٸلۋگە جەنە وعان قاتىستى قۇقىق قورعاۋ ورگاندارى تاراپىنان اتقارىلعان جۇمىستار مەن ولاردىڭ قىزمەتٸندەگٸ بٸرقاتار كەمشٸلٸكتەر مەن جەتٸستٸكتەرٸ تۋرالى الدىن الا قورىتىندى جاساۋعا مٷمكٸندٸك بەرەدٸ. بٸرٸنشٸدەن, قوعامدى مازالايتىن ەڭ ماڭىزدى سۇراقتاردىڭ بٸرٸ – «قاڭتار وقيعاسى» سيياقتى قاندى قىرعىن قالاي بولدى? تەرروريزم بولدى ما? ونى ۇيىمداستىرۋشىلار بولدى ما?» دەگەن ماعىنادا, سول سەبەپتٸ وسى مەسەلەلەر بويىنشا قىسقاشا توقتالىپ كەتەيٸن», - دەدٸ قۇسپان مەجٸلٸستٸڭ جالپى وتىرىسىندا.
ونىڭ ايتۋىنشا, بارلىق ٶڭٸردە سول جاپپاي تەرتٸپسٸزدككە قاتىسۋشىلارمەن بولعان كەزدەسۋ نەتيجەسٸندە بەرٸنە بٸردەي ورتاق, مىناداي بەلگٸلەرٸ بارى انىقتالدى:
- جاپپاي تەرتٸپسٸزدٸكتٸڭ بٸر كەزەڭ, بٸر ۋاقىت ارالىعىندا باستالۋى;
- ارانداتۋشى توپتىڭ بولۋى, ولاردىڭ ورتاق, بٸر تالاپتارىنىڭ بولۋى, مىسالى, بارلىق جەردە دە بەيبٸت ميتينگٸگە شىققان كٶپشٸلٸكتٸ وبلىس, قالا ەكٸمشٸلٸگٸن باسىپ الۋعا ٷگٸتتەۋشٸلەردٸڭ بولعانى;
- جەكەلەگەن جاعدايدا, قۇقىق قورعاۋ ورگاندارىنىڭ ۋاقىتىلى قيمىلداماۋى, كەيدە مٷلدەم ەرەكەتسٸزدٸك تانىتۋى;
- وڭتٷستٸك ٶڭٸرلەردە, بەيبٸت ميتينگٸگە قاتىسۋشىلار بۇرىن ٶزدەرٸ كٶرمەگەن, تانىمايتىن ەسكەري تەرتٸپتٸ, بەلگٸسٸز ادامداردىڭ بولعانى ت.ب.
«بۇل جاعدايلار, ەۋ باستا بەيبٸت باستالعان ميتينگٸلەردٸ جاپپاي تەرتٸپسٸزدٸككە ۇلاستىرۋعا مٷددەلٸ توپتاردىڭ بولعانى جەنە ولاردىڭ ورتالىقتاندىرىلعان تٷردە, ماقساتتى جۇمىس ٸستەگەنٸنە بٸزدٸڭ كٶزٸمٸزدٸ جەتكٸزە تٷستٸ», - دەدٸ ابزال قۇسپان.
