2021 jyly qańtar aiynda kópbalaly analar 22,5 mln teńgege járdemaqy aldy, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
«2021 jyly qańtarda kópbalaly otbasylarǵa beriletin memlekettik járdemaqy tólemderimen jalpy somasy 22,5 mln teńgege orta eseppen 430,3 myń otbasy qamtyldy. 2020 jylǵy jeltoqsanda járdemaqynyń bul túrin 428,3 myń otbasy jalpy somasy 22 mln teńgege aldy», delingen habarlamada.
Vedomstvonyń málimetinshe, birge turatyn 4 jáne odan da kóp kámeletke tolmaǵan nemese 23 jasqa deiingi kúndizgi bólimde oqityn stýdent balalary bar otbasylar tabysyna qaramastan atalǵan memlekettik járdemaqyǵa úmitker bola alady.
«2021 jyly tólem mólsheri balalardyń sanyna bailanysty 46 760 myń teńgeden (4 bala) 81 852 myń teńgege (7 bala) deiin saralandy, 8 balaǵa – 93 344 teńge, 9 balaǵa – 105 012 teńge, 10 balaǵa – 116 680 teńge, 11 balaǵa – 128 348 teńge, 12 balaǵa – 140 016 teńge, 13 balaǵa – 151 684 teńge, 14 balaǵa – 163 352 teńge, 15 balaǵa – 175 020 teńge, 16 balaǵa – 186 688 teńge beriledi».
Eske sala keteiik, kópbalaly otbasylarǵa olardyń kirisi esepke alynbai beriletin jańa memlekettik járdemaqy Qazaqstanda 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde kózdelgen tabysy az jáne kópbalaly otbasylardy qoldaýdyń úsh negizgi baǵyty sheńberinde engizildi.
