Adam quqyqtary jónindegi ýákildiń atyna azaptaý men qatygezdik týraly 20 jazbasha shaǵym túsken. Bul týraly Elvira Ázimova «Habar-24» telearnasynda ótken brifingide aitty, dep habarlaidy QazAqparat.
«Qazirgi ýaqytta azamattardan ózimniń atyma qańtar aiyndaǵy bolǵan oqiǵalarǵa bailanysty zańbuzýshylyqtar týraly biraz ótinish kelip túsip jatyr. Sonymen birge biz 13-19 qańtar arasynda óńirlerde 81 tergeý izoliatoryna jáne ýaqytsha ustaý izoliatoryna baryp, táýelsiz monitoring jasadyq», - degen ýákil sol monitoringtiń alǵashqy qorytyndylaryna toqtaldy.
«Azamattardyń quqyǵy buzylǵany týraly 39 ótinish tústi. Onyń 20-sy — azaptaý men qatygezdikke qatysty jazbasha túrde túsken ótinishter. Qalǵandary negizsiz qamaýǵa alý, ákimshilik jazalaý týraly sot sheshimderimen kelispeý, meditsinalyq kómek kórsetpeý, advokattardy jibermeý máselelerine qatysty.
Degenmen, áleýmettik jelide zańbuzýshylyqtar týraly qońyraýlar men habarlamalar aitarlyqtai kóp boldy», - dedi Elvira Ázimova.
