QR Ishki ister ministriniń birinshi orynbasary Marat Ojaev QR Parlament Májilisindegi adam quqyqtary máselesine arnalǵan dóńgelek ústelde qańtardaǵy tártipsizdikter boiynsha qozǵalǵan qylmystyq ister jóninde sońǵy málimetterdi aitty, dep habarlaidy QazAqparat.
«Qańtardaǵy tártipsizdikterge bailanysty ministrlikke azamattardy qamaý oryndaryna zańsyz jetkizý, ustaý, jaýapkershilikke tartý týraly kóptegen shaǵym tústi. Árbir osyndai fakti boiynsha, shaǵym men jariialanym boiynsha tyńǵylyqty tekserý júrgiziledi. Eger ol málimet rastalsa, dereý shara qoldanylady», - dedi IIM ókili.
Vedomstvonyń birinshi vitse-ministri qańtar oqiǵasy boiynsha ustalǵandardyń isi arnaiy prokýrorlardyń baqylaýynda ekenin eske saldy.
«Memleket basshysynyń tapsyrmasy boiynsha terroristik aktilerdiń, jappai tártipsizdikterdiń sebepteri men uiymdastyrýshylaryn anyqtaý jumystary Bas Prokýratýraǵa júktelgenin esterińizge salǵym keledi. Osyǵan bailanysty atalmysh sanattaǵy jáne osy oqiǵalarmen bailanysty isterdiń bári arnaiy prokýrorlar basqaratyn vedomstvoaralyq tergeý tobyna berildi», - dedi ol.
Aitýynsha, qazir Ishki ister organdary qańtar oqiǵasyna qatysy bar degen 792 adamdy qamaýǵa alǵan.
«Qazirgi tańda ishki ister organdarynda 2,5 myńnan astam qylmystyq is tergelip jatyr. Onyń negizgi bóligi tonaý men urlyqqa qatysty. Qylmys jasady degen kúdikpen ýaqytsha ustaý izoliatoryna 893 adam jetkizildi. Sonyń 792-si qamaýǵa alyndy. Ustalǵandardyń kinási qoldy bolǵan, zaqym kelgen múlik túrindegi tárkilengen zattai aiǵaqtardyń, video, foto materialdardyń jáne tergeý organdarynyń basqa da protsessýaldyq sharalarynyń kómegimen dáleldenip jatyr», - degen IIM ókili isterdiń bári qylmystyq protsestiń úsh býyndy modeli aiasynda iske asyp jatqanyn atady.
