Májilistiń jalpy otyrysynda depýtat Janarbek Áshimjan quzyrly organdar «qańtar qasiretine» bailanysty qoǵam suraqtaryna jaýap berýi kerek ekenin aitty, dep habarlaidy QazAqparat.
«Jyl basyndaǵy elimizdiń qoǵamdyq-saiasi ómirine «Qańtar qasireti» degen atpen engen taǵdyrly kezeńniń oryn alǵanyna kóp ýaqyt ótken joq. Árine, bul Táýelsiz Qazaqstannyń saiasi tarihyndaǵy eń bir aýyr jáne memlekettik qurylymǵa da syn-qater tóngen asa qiyn shaq bolǵany daýsyz. El Prezidenti Qasym-Jomart Kemeluly sol qańtar oqiǵasy kezinde elde oryn alǵan jaǵdailarǵa bailanysty jedel tergeý tobyn quryp, egjei-tegjeili tekserý baǵytynda tiisti memlekettik organdarǵa arnaiy tapsyrma bergen. Sonymen qatar, Memleket basshysy «Qańtar qasiretinen» zardap shekken azamattarǵa, biznes nysandaryna tiisti memlekettik qoldaý jóninde naqty mindettemeler júktegen bolatyn. Sodan beri eki aidyń júzi boldy. Jaqynda ǵana áriptesterimiz respýblikanyń ár óńirinde bolyp, el-halyqpen kezdesip, túiini qalyń túrli áleýmettik máselelerdi óz kózderimen kórip qaitty. Sol kezdesýlerde qoǵam tarapynan, eldegi belsendi azamattardan, aqparat quraldarynyń ókilderinen «Qańtar oqiǵasyna quqyqtyq baǵa qashan beriledi?» degen suraqtar qoiyldy», - dedi J. Áshimjan QR Bas prokýrorynyń atyna joldaǵan saýalynda.
Osy oraida ol depýtattar osy qańtar oqiǵasyna bailanysty jaǵdailarǵa alǵashqy sátterden bastap aralasqanyn jetkizdi. Májilis depýtattary ár óńirge baryp, oqiǵaǵa qatysty ustalǵandarmen, qoǵam belsendilerimen, advokattarmen, isti bolyp jatqandardyń týystarymen, oqiǵa saldarynan zardap shekken kásipkerlermen, áskerilermen kezdesti. Qiraǵan ǵimarattar men tehnikalardy, strategiialyq nysandardy óz kózderimen kórdi.
«Men qańtardyń qaraly kúnderi eń aýyr jaǵdailardy bastan keshken Almaty oblysy men Almaty qalasynda bolyp, Májilis depýtaty retinde qalyń buqaramen jáne isti bolyp jatqandardyń týystarymen arnaiy kezdestim. Abaqtyda jatqandardyń ata-analarynyń talaptary boiynsha Taldyqorǵan qalasyndaǵy tergeý izoliatorynda bolyp, jastarmen de júzdesip, sóilestim. Sebebi – isti bolyp jatqandardyń ata-analary, týystary tarapynan «tergeý izoliatorlarynda naǵyz azaptaýlar, qylmysty kúshpen moiyndatýdyń adamtózgisiz túrlerin qoldanyp jatyr» degendi alǵa tartty. Búkil kameralardy aralap, árqaisymen jeke-jeke sóilesip, kóz kórip, kóńil sengen jaǵdailardy kóńili alań bolyp otyrǵan týǵan-týystaryna jetkizdim. Dál osyndai kezdesýlerdi áriptesterimiz Almaty, Shymkent, Taraz qalalarynda da ótkizgen bolatyn», - dedi depýtat.
Onyń aitýynsha, osy kúnderde túrli áleýmettik jelilerde eldiń kóńiline qaiaý túsiretin santúrli aqparattar aǵyny tasqyndap tarap jatyr.
«Qoǵam negizgi resmi aqparatqa qol jetkize almaǵan sátte, sózsiz ańyz-shyny aralas alypqashpa dúnieler aldyńǵy qatarǵa shyǵady. Al sol eldiń qulaǵyn elý qylǵan resmi emes aqparattar eldiń arqasyn aiazdai qaryp, halyq ishinde túrli qaýesetterdiń oshaǵyn mazdatty. Bul dáleldenbegen feik aqparattardy óz maqsatyna paidalanyp, upai jinaǵysy kelgen ishki jáne syrtqy kúshter de bolmai qalǵan joq. Dál qazir tergeý isi júrip jatyr. Túsinemiz, tergeý isiniń óz protsesi bar. Aldaǵy ýaqytta sot úkimi de kezeń-kezeńimen shyǵa jatar. Alaida arada eki ai ýaqyt ótse de qoǵam sol qasiretti oqiǵa týraly nege bastapqy aqparattarǵa qol jetkize almai otyr? Bul – eń birinshi kezekte memlekettik tóńikeriske jasalǵan qadam degen sóz aityldy. Al eldiktiń tamyryna balta shabýdy kózdegenderdiń kóshine ilesip, elimizdegi iri qalalardaǵy ákimshilik oryndary men biznes nysandaryna, kúshtik qurylym ǵimarattaryna shabýyldaǵandar kimder? Jappai tártipsizdikti uiymdastyrǵandar, qarý urlaǵandar kimder? Qansha adam jábirlendi? Japa shekken kásipkerler men zábir kórgen azamattarǵa tolyqqandy kómek kórsetý úderisi qashan aiaqtalady? Arandaǵan kimder? Arandatqan kimder? Órtenip jatqan ǵimarattarǵa bas-siraǵyn úitip júrgender kimder? Izoliatorlardaǵy jatqandardyń jai-kúii qalai? Olardyń quqy qai deńgeide saqtalýda? Qylmystyq is qashan aiaqtalady? Sotqa qashan jiberiledi? Jalpy sol kúnderi qandai jaǵdai oryn aldy?», - dep surady Janarbek Áshimjan.
Bul turǵyda ol dál osy kúnderi qoǵam tarapynan qoiylǵan osy suraqtar áli kúnge deiin ashyq kúiinde turǵanyn aitty
«Osy suraqtardyń bárine búkpesiz, ashyq jaýap berilý kerek. Ýaqyt uzaǵan saiyn senim setinep, kúdiktiń tumany qalyńdai beredi. Sondyqtan tiisti kúshtik qurylymdar, memlekettik organ basshylary jedeldetip Májilistiń tórine kelip, oqiǵaǵa bailanysty osy jáne basqa da saýaldarǵa ashyq jáne anyq, betpe-bet jaýap berýi kerek. Bul – halyqtyń, qoǵamnyń talaby!», - dedi depýtat.
Óz kezeginde Májilis tóraǵasy Erlan Qoshanov bul bastamaǵa qoldaý bildirdi.
«Árine, biz tergeý qupiiasyna nemese naqty qylmystyq ister boiynsha tergeý amaldaryna aralasa almaimyz. Bul turǵyda zańnamada shekteýler bar. Biraq qoǵam qańtar oqiǵalaryna bailanysty suraqtarǵa jaýap kútip otyr. Osyǵan bailanysty otyrystardyń birinde bul máseleler boiynsha tiisti laýazymdy tulǵalardyń aqparatyn tyńdaǵan durys bolar dep oilaimyn», - dedi E. Qoshanov.
Osy oraida ol Májilistiń tiisti komiteti men apparat basshylyǵyna atalǵan tiisti organdar ókilderiniń jaýap berýin uiymdastyrý tapsyrmasyn berdi.
