Qańtar oqiǵasyna qatysty sot sanktsiialarymen 627 kúdikti adam qamaýda otyr. Bul týraly Ortalyq kommýnikatsiialar qyzmetinde QR Bas prokýratýrasy 1-qyzmet bastyǵynyń orynbasary Eldos Qilymjanov aitty, dep habarlaidy QazAqparat.
«Bas prokýratýra qańtar oqiǵalaryna bailanysty qylmystyq isterdiń tergelý barysy týraly habarlaidy. Bultartpaý sharalardy jeńildetý boiynsha toqtalsaq, búgingi kúni tergeý organdarynyń is júrgizýinde atalǵan sanatta 4 849 is bar. Sot sanktsiialarymen 627 kúdikti adam qamaýda. Biz buǵan deiin qoldanylǵan bultartpaý sharalaryn jeńildetý boiynsha jumystardy júrgizip jatyrmyz», - dedi Qilymjanov.
Onyń aitýynsha, jeke basyn, densaýlyq jaǵdaiyn jáne basqa da sipattaityn jaǵdailardy eskere otyryp, 280 adamǵa kúzetpen ustaý bultartpaý sharasy eshqaida ketpeý týraly qolhatqa, kepilge, úiqamaqqa jáne jeke kepilgerlikke aýystyryldy.
«Prokýrorlar ustalǵandar jáne jaýaptylyqqa tartylyp jatqan adamdardyń týystarymen kezdesýler ótkizýde. Olardyń ýájderi men dálelderi jan-jaqty tekserilip, osy negizde bultartpaý sharalardy ózgertý jóninde sheshimder qabyldanyp jatyr», - dedi Bas prokýratýra ókili.
