Qańtar oqiǵalary kezinde politsiia tótenshe jaǵdai jáne terrorizmge qarsy operatsiia aiasynda qarý qoldanýǵa májbúr boldy. Bul týraly Májiliste QR Ishki ister ministri Marat Ahmetjanov aitty, dep habarlaidy QazAqparat.
Onyń atap ótýinshe, qańtar oqiǵalary kezinde qarjy uiymdary, bankter, saýda ortalyqtary, dúkender tonaldy. Nátijesinde, 1 700 azamat pen biznes sýbektileri zardap shekti. Jalpy shyǵyn somasy 100 mlrd teńgeden asty.
«Ókinishke orai, 19 qyzmetkerimiz qaza tapty. 3 myńnan astam politsiia men áskeri qyzmetshi jaraqat aldy. Kóptegen qyzmetker áli de em alýda. Birazy ókinishke orai densaýlyqtaryna bailanysty bolashaqta bizdiń qatarymyzda qyzmetterin jalǵastyra almaidy. Sondyqtan qyzmetkerler tótenshe jaǵdai jáne terrorizmge qarsy operatsiia aiasynda qarý qoldanýǵa májbúr boldy», - dedi ol.
Osy oraida ministr qarý qoldaný «Quqyq qorǵaý qyzmeti týraly» Zańnyń 61-babyna sáikes júzege asqanyn aitty.
«Atap aitqanda azamattardy qorǵaý; qyzmetkerlerge jáne kúzetý obektilerine jasalǵan shabýylǵa toitarys berý; qarý men arnaiy kólikterdi basyp alýǵa jol bermeý jáne qarýly adamdardy ustaý maqsatynda qoldanyldy», - dedi Marat Ahmetjanov.
