Semeide áskerilerge tiesili «TIGR» arnaiy kóligin basyp alýǵa qatysqan kúdiktilerdiń biri ustaldy. Bul týraly QR Ishki ister ministrligi Tergeý departamentiniń bastyǵy Sanjar Ádilov aitty, dep habarlaidy QazAqparat.
«Qazirgi ýaqytta ishki ister organdary tergeýshileriniń óndirisinde 2 548 qylmystyq is bar. Qylmys jasady degen kúdik boiynsha ýaqytsha ustaý abaqtysyna 887 adam ustalyp, onyń 789-y qamaýǵa alyndy. Olardyń 205-i - buryn qylmystyq jaýapkershilikke tartylǵan, 8-i - izdeýde júrgen adamdar», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, kúdiktilerdiń kinási alynǵan zattai dáleldemelermen, beinebaqylaý kameralarynyń jazbalarymen, kýálardyń aiǵaqtarymen jáne basqalarmen dáleldenedi.
«Mysaly, Semei qalasynda ákimshilikti jáne áskerilerge tiesili «TIGR» arnaiy kólik quralyn basyp alýǵa qatysýshylardyń biri ustaldy. Kúdiktiniń kinási onyń uialy telefonynan tabylǵan beinejazbamen dáleldendi. Ol ýaqytsha ustaý abaqtysyna jabylyp, sot sanktsiiasymen qamaýǵa alyndy. Tergeý organdary aýyr jáne asa aýyr qylmys jasaǵan adamdardy ǵana ustaitynyn taǵy da atap ótemin. Aýyrlyǵy az qylmystar boiynsha – qamaýǵa alýmen bailanysty emes bultartpaý sharalary qoldanylady», - dedi Sanjar Ádilov.
