Jelide Almatyda qarý ustaǵan buzaqylardyń politseiler men áskerilerge taiaq pen armatýramen shabýyl jasaǵan videosy paida boldy, dep habarlaidy QazAqparat.
Kadrda toptasqan búlikshilerdiń politseiler men áskerilerdi qorshap alǵany beinelengen. Olardyń formasy men pogonyn julyp alyp, soqqyǵa jyqqan. Áskerilerdiń qalqany men basqa da qarýlaryn tartyp alǵan.
«Sarbazdy bári jabylyp uryp jatyr. Taiaqpen, aiaqpen», - dep pikir bildirdi video avtory.
Áskeri qyzmetshiniń qany sorǵalap aqqan sarbazdy alańnan áketip bara jatqanyn kórýge bolady. Videoǵa taǵy bir áskeridiń jaraqat alǵan sáti túsip qalǵan. Túnge qarai buzaqylar men búlikshiler shoqparmen jáne qalqanmen qyzmettik avtokólikterdi qirata bastaǵan. Radikaldardyń qarýly toby barlyq áinekterdi qiratyp, mashinalardyń ústine sekirip, ákimshilik ǵimarattardy jaqqan.
Eske salaiyq, 1 qańtarda Mańǵystaý oblysy Jańaózen qalasynda saǵat 17:20-da qala ákimdiginiń aldynda turǵyndar jinaldy. Olar el basshylyǵyna videoúndeý jasap, suiyltylǵan gaz baǵasyn túsirýdi surady.
Sol kúni saǵat 18:00-de adamdar tarady.
Sodan keiin 2 qańtarda narazylyq bildirýshiler sany birneshe júzdegen adamǵa artty, al aktsiiaǵa qatysýshylar ishki joldy japty. Quqyq qorǵaý organdary kúsh qoldanǵan joq.
3 qańtardan bastap narazylyq bildirýshiler basqa qalalarda jáne óńirlerde shyǵa bastady. Sol kúni Mańǵystaý oblysynyń turǵyndaryn qoldaý maqsatynda basqa jeti óńirde - Atyraý, Aqtóbe oblystary, Nur-Sultan, Almaty qalalary, BQO, Almaty oblysy men ShQO-da «beibit» mitingter bastaldy.
4 qańtarda mitingiler jalǵasty, al oǵan qoldaý bildirgen óńirler sany 11-ge jetti. Qatysýshylar sany 37 myń adamǵa deiin ósti. Almaty men Shymkentte qarýly shabýyldar jasaldy.
