Qańtar oqiǵasyna bailanysty kúsh qurylymdarynyń qyzmetkerlerine qatysty 234 qylmystyq is tergelip jatyr. Bul týraly Májilistiń jalpy otyrysynda qańtar oqiǵasyna qatysty máselelerdi qaraý kezinde Sybailas jemqorlyqqa qarsy is-qimyl agenttiginiń tóraǵasy Oljas Bektenov málim etti, dep habarlaidy QazAqparat.
«Qańtar aiyndaǵy oqiǵalardan keiin, quqyq qorǵaý organdaryna kúshtik qurylymdardyń qyzmetkerleriniń áreketterine qatysty aryzdar kelip túse bastady. Atalǵan aryzdar boiynsha Sybailas jemqorlyqqa qarsy qyzmetke prokýratýradan jáne Ishki ister ministrliginen 125 qylmystyq is kelip tústi. Sybailas jemqorlyqqa qarsy qyzmet 109 aryz boiynsha sotqa deiingi tergep-tekserýdi bastady. Nátijesinde, Sybailas jemqorlyqqa qarsy qyzmet 234 qylmystyq is boiynsha tergeý júrgizip jatyr», - dedi O. Bektenov.
Onyń aitýynsha, 11 aryzdanýshynyń olardy joǵary temperatýrany qoldana otyryp, azaptaý faktisi boiynsha tirkelgen qylmystyq is aiasynda barlyq keshendi jedel-tergeý is-sharalary ýaqtyly ótkizildi.
«Nátijesinde, aryzdanýshylar olarǵa qatysty tyiym salynǵan tergeý ádisterin qoldanǵan politsiia qyzmetkerin tanydy.
Barlyq dáleldemeler bekitilgennen keiin, atalǵan qylmystyq is arnaiy prokýrorlarǵa berildi», - dedi agenttik basshysy.
