© Sputnik / Aleksei Filippov
Prokýratýra organdaryna tergeý kezinde zańsyz ádis-tásilderdi qoldanýǵa qatysty 250 aryz-shaǵym tústi. Bul týraly bas prokýrordyń orynbasary Áset Shyndaliev málimdedi, dep habarlaidy Sputnik Qazaqstan.
"Bizge tergeý kezindegi zańsyz tásilderge qatysty 250 aryz tústi. Olar boiynsha biz 133 qylmystyq is qozǵadyq. Bul ister prokýrorlardyń qatań baqylaýyna alyndy. Ár is boiynsha protsessýaldyq prokýror taǵaiyndalǵan", - dedi Shyndaliev májilistiń jalpy otyrysynda.
Osy oraida bas prokýrordyń orynbasary tergeýge qatysty qabyldanǵan zańdardy eske saldy. Oǵan sáikes, tergeýshi árbir negizgi sheshimin prokýrormen kelisýge mindetti.
"Sondyqtan birde-bir is prokýrordyń nazarynan tys qalmaidy dep oilaimyn", - dedi Shyndaliev.
Onyń aitýynsha, qazirgi kezde tergeý izoliatorlarynda prokýrolardyń qabyldaýy da ótip jatyr.
"Birinshi kúnderi prokýrorlar 96 adamdy ýaqytsha ustaý izoliatorlarynan bosatty. Odan keiin biz ustalǵan adamdardyń otbasylyq jaǵdaiyn, jasyn jáne densaýlyǵyn eskerip basqa bultarpaý sharasyna aýystyrý máselesin qarastyryp jatyrmyz. Osy jumystyń nátijesinde 92 adam tergeý izoliatorlarynan shyǵaryldy", - dep atap ótti Shyndaliev.
