Ishki ister organdarynyń tergeýshileri qańtar oqiǵasyna qatysty 2997 qylmystyq isti tergep jatyr. Bul týraly QR Ishki ister ministrligi Tergeý departamentiniń bastyǵy Sanjar Ádilov aitty, dep habarlaidy QazAqparat.
«Jappai tártipsizdikterge qatysty qylmystyq ister arnaiy prokýrorlardyń is júrgizýinde, óz kezeginde ishki ister organdary urlyqtardy, tonaýlardy, qarýdy urlaý men tártipsizdik barysynda jasalǵan basqa da qylmystardy tergeýmen ainalysady. Qazir ishki ister organdary tergeýshileriniń óndirisinde 2997 qylmystyq is bar, olar boiynsha sot sanktsiiasymen 194 adam qamaýda ustalyp otyr. Olardyń kópshiligi, atap aitsaq, 152 adam jappai tártipsizdik barysynda urlyq jasaǵany úshin, 22 adam qarýdy zańsyz saqtaǵany jáne 24 adam qarýdy urlaǵany úshin qamaqqa alyndy», - dedi spiker Ortalyq kommýnikatsiialar qyzmetinde ótken brifingide.
Jeke basyn, densaýlyq jaǵdaiyn jáne tergeýge kórsetilgen kómekti eskere otyryp, 199 kúdiktige qamaýda ustaý sharasy eshqaida ketpeý týraly qolhatqa, kepilge, úiqamaqqa alýǵa jáne jeke kepilgerlikke aýystyrylǵan.
«Qamaýdaǵy kúdiktilerge tergeý izoliatorlarynda, sondai-aq qajet bolǵan jaǵdaida meditsinalyq mekemelerde bilikti meditsinalyq járdem kórsetiledi. Qazirgi ýaqytta ishki ister organdarynyń isteri boiynsha qamalǵandar arasynda densaýlyqqa shaǵymdanǵandar joq. Olarǵa advokattardyń, týystardyń jáne quqyq qorǵaýshylardyń kelýine kedergisiz ruqsat qamtamasyz etilgen. Ishki ister organdary qańtar oqiǵalary boiynsha 174 kúdiktige qatysty qylmystyq isterdi aiyptaý aktisimen aiaqtady», - dedi Sanjar Ádilov.
