Qańtar oqiǵasy boiynsha qylmystyq jaýap tartylǵan 275 adamnyń 244-ine bas bostandyǵyn aiyrýdy kózdemeitin jaza taǵaiyndaldy, dep habarlaidy QazAqparat.
Bul týraly QR Ishki ister ministrliginiń Tergeý departamentiniń bastyǵy Sanjar Ádilov Ortalyq kommýnikatsiialar qyzmetinde ótken brifingide aitty.
«Sottar qaralǵan qylmystyq ister boiynsha aiyptalatyn adamdardyń kópshiligin bas bostandyǵyn aiyrýdy kózdemeitin jazalarǵa sottady. Al bul 275 adamnyń ishinen 244 degen sóz. Taǵy 6 adamǵa qatysty qylmystyq ister taraptardyń tatýlasýyna bailanysty toqtatyldy. Mysaly, Almaty oblysynyń turǵyndary jappai tártipsizdik barysynda Taldyqorǵan qalasy Politsiia basqarmasynyń zattar qoimasyna kirip ketip, somasy 195 myńnan artyq teńgege múlikti jymqyrǵan», - dedi Tergeý departamentiniń bastyǵy.
Aitýynsha, Taldyqorǵan qalalyq sotynyń úkimimen sottalýshylardyń jeke basy men keltirilgen zalaldyń ornyn toltyrǵany eskerilip, olardyń bas bostandyǵy 3 jyl, 6 ai merzimge ǵana shektelgen.
«Taǵy bir mysal, Almaty oblysynyń úsh turǵyny jappai tártipsizdik barysynda Almaty qalasyndaǵy Tóle bi kóshesindegi «Siti moll» saýda úiinen jalpy somasy 470 myń kiim-keshek pen sporttyq velosipedti urlaǵan.
Almaly aýdanynyń soty olardyń jeke basy men keltirilgen zalaldyń orny toltyrylǵanyn eskere otyryp, olardy eki jylǵa bas bostandyǵyn shekteýge sottady», - dedi Sanjar Ádilov.
