قاڭتار وقيعاسى بويىنشا قىلمىستىق جاۋاپ تارتىلعان 275 ادامنىڭ 244-ٸنە باس بوستاندىعىن ايىرۋدى كٶزدەمەيتٸن جازا تاعايىندالدى, دەپ حابارلايدى قازاقپارات.
بۇل تۋرالى قر ٸشكٸ ٸستەر مينيسترلٸگٸنٸڭ تەرگەۋ دەپارتامەنتٸنٸڭ باستىعى سانجار ەدٸلوۆ ورتالىق كوممۋنيكاتسييالار قىزمەتٸندە ٶتكەن بريفينگٸدە ايتتى.
«سوتتار قارالعان قىلمىستىق ٸستەر بويىنشا ايىپتالاتىن ادامداردىڭ كٶپشٸلٸگٸن باس بوستاندىعىن ايىرۋدى كٶزدەمەيتٸن جازالارعا سوتتادى. ال بۇل 275 ادامنىڭ ٸشٸنەن 244 دەگەن سٶز. تاعى 6 ادامعا قاتىستى قىلمىستىق ٸستەر تاراپتاردىڭ تاتۋلاسۋىنا بايلانىستى توقتاتىلدى. مىسالى, الماتى وبلىسىنىڭ تۇرعىندارى جاپپاي تەرتٸپسٸزدٸك بارىسىندا تالدىقورعان قالاسى پوليتسييا باسقارماسىنىڭ زاتتار قويماسىنا كٸرٸپ كەتٸپ, سوماسى 195 مىڭنان ارتىق تەڭگەگە مٷلٸكتٸ جىمقىرعان», - دەدٸ تەرگەۋ دەپارتامەنتٸنٸڭ باستىعى.
ايتۋىنشا, تالدىقورعان قالالىق سوتىنىڭ ٷكٸمٸمەن سوتتالۋشىلاردىڭ جەكە باسى مەن كەلتٸرٸلگەن زالالدىڭ ورنىن تولتىرعانى ەسكەرٸلٸپ, ولاردىڭ باس بوستاندىعى 3 جىل, 6 اي مەرزٸمگە عانا شەكتەلگەن.
«تاعى بٸر مىسال, الماتى وبلىسىنىڭ ٷش تۇرعىنى جاپپاي تەرتٸپسٸزدٸك بارىسىندا الماتى قالاسىنداعى تٶلە بي كٶشەسٸندەگٸ «سيتي مولل» ساۋدا ٷيٸنەن جالپى سوماسى 470 مىڭ كيٸم-كەشەك پەن سپورتتىق ۆەلوسيپەدتٸ ۇرلاعان.
المالى اۋدانىنىڭ سوتى ولاردىڭ جەكە باسى مەن كەلتٸرٸلگەن زالالدىڭ ورنى تولتىرىلعانىن ەسكەرە وتىرىپ, ولاردى ەكٸ جىلعا باس بوستاندىعىن شەكتەۋگە سوتتادى», - دەدٸ سانجار ەدٸلوۆ.
