QR Ishki ister ministrliginiń Tergeý departamentiniń bastyǵy Sanjar Ádilov ótken aptada qańtar oqiǵasy boiynsha 12 kúdikti qamaýdan bosatylǵanyn aitty, dep habarlaidy QazAqparat.
«Sotqa joldanǵan ister boiynsha jábirlenýshilerge somasy shamamen 100 mln teńge bolatyn zardaptyń orny toltyrylǵanyn atap ótkim keledi. Bul politsiia qyzmetkerleriniń urlanǵan múlikti anyqtaýy jáne alyp qoiýy, sondai-aq aiyptalýshylardyń sotqa deiingi tergep-tekserý, onyń ishinde sot tergeýi kezeńinde zardaptyń ornyn toltyrǵany nátijesinde qamtamasyz etildi», - deidi Sanjar Ádilov Ortalyq kommýnikatsiialar qyzmetinde ótken brifingide.
Aitýynsha, ótken aptada 12 kúdikti kúzetpen ustaýdan bosatylǵan. Iaǵni, bultartpaý sharasy ózgertilgen.
«Búgingi tańda ishki ister organdarynyń isteri boiynsha barlyǵy 333 kúdikti osy negizder boiynsha kúzetpen ustaýdan bosatyldy.
Olardyń ishinde 96 adamdy bultartpaý sharasy úiqamaqqa aýystyryldy. 78 adam kepil arqyly, 67 adam eshqaida ketpeý jáne durys minez-qulyq týraly qolhat arqyly jáne 11 adam jeke kepilgerlik arqyly bultartpaý sharasyn ózgertýge múmkindik aldy.
Odan basqa sottardyń úkimderi boiynsha 81 sottalýshy kúzetpen ustaýdan bosatyldy», - degen IIM ókili Almatyda «Magným» sýpermarketinen azyq-túlikti urlaǵan bir kúdiktiniń de bosatylǵanyn atap ótti.
«Tergeý barysynda kúdikti tolyǵymen materialdyq zalaldyń ornyn toltyrdy. Sottyń úkimimen ol kináli dep tanyldy. Biraq jábirlenýshi taraptan talaptardyń bolmaýy eskerilip, ol bosatyldy, degenmen oǵan eki jylǵa bas bostandyǵyn shekteý túrinde jaza qoldanyldy», - dedi Tergeý departamentiniń bastyǵy.
