Bas prokýrordyń orynbasary Áset Shyńdaliev qańtar oqiǵasy boiynsha raqymshylyqqa ilikken adamdardy bosatý tártibin túsindirdi, - dep habarlaidy Tengrinews.kz agenttigi.
Senat otyrysy kýlýarynda jýrnalister bas prokýrordyń orynbasarynan qańtar oqiǵasyna qatysty raqymshylyqqa ilikkender qashan bosatylatynyn surady.
"Naqty merzimin aita almaimyn, óitkeni birqatar ister áli aldyn ala tergeý organdarymen júrgizilip jatyr. Aýyr jáne asa aýyr qylmystar boiynsha aldyn ala tergeý tolyq kólemde júrgizilip jatyr. Is sotqa jiberiledi, sot bul isti qaraidy, úkim shyǵarylǵan kezde ǵana sot raqymshylyq aktisin qoldanady. "Raqymshylyq jasaý týraly" zańda alty ai ishinde ýákiletti organdar júzege asyrý úshin barlyq uiymdastyrý sharalaryn qabyldaýy tiis degen norma bar", - dep túsindirdi Shyńdaliev.
Ol qazirdiń ózinde jazasyn ótep jatqandardyń 102-si raqymshylyqqa iligetinin aitty.
"Úkim bolsa, bas bostandyǵynan aiyrý jazasyna kesilgen bolsa, mekeme ákimshiligi nemese onyń ózi oǵan raqymshylyq aktisin qoldaný týraly sotqa ótinish jiberedi. Zań boiynsha sot ony bir ai ishinde qarai alady, sodan keiin sot sheshim shyǵarady. Eger adam aýyrlyǵy az jáne ortasha ister boiynsha sottalǵan bolsa, ol jazadan bosatylady, ol birden bosatylýy múmkin. Al eger jai ǵana jazany qysqartý bolsa, onda ol qalǵan merzimin óteýi kerek",- dep qosty ol.
Eske salaiyq, Memleket basshysy Qasym-Jomart Toqaev raqymshylyq jasaý týraly zańǵa qol qoiǵany habarlanǵan bolatyn.
