Qańtar oqiǵasy kezinde zardap shekken bir top kásipker keltirilgen shyǵyndy dáleldei almai júr. Osyǵan bailanysty búgin olar «Aqiqat» qoǵamdyq komissiiasyna júgindi, dep habarlaidy QazAqparat.
«Aqiqat» qoǵamdyq komissiiasynyń keńsesine 20-ǵa jýyq kásipker keldi. Olar jappai tártipsizdik kezinde kásipterine keltirilgen shyǵyndy dáleldei almai júr. Qoldarynda bar qujattary jaramsyz dep tanylǵan.
Solardyń biri — jeke kásipker Qarlyǵash Kertaiqyzy. Ol qaladaǵy saýda úileriniń birinde erlerge arnalǵan kiim satqan. Qańtar oqiǵasy kezinde taýarlary órtenip, tonalǵan.
«Maǵan keltirgen shyǵyn 35 mln teńge. Meniń qolymda taýar paraǵy (tovarnaia nakladnaia) bar. Alaida, bul qujatpen eshteńeni dáleldei almai júrmin. Sot-meditsinalyq saraptama bizge taǵaiyndalmaidy, óitkeni, bizde mór de, shot-faktýrada joq. Býhgalterlik esep te júrgizilgen emes. Basty máselemiz osynda bolyp tur. Biz JK (jeke kásipker) bolǵandyqtan zań boiynsha bizden mundai qujat talap etilmeitin. Bizdiń bir ǵana usynysymyz bar: kásipkerlerdiń shyǵynyn óteýdiń erejesi jeńildetilse eken», - deidi jeke kásipker Qarlyǵash Kertaiqyzy.
Kásipkerlerdiń sózinshe, politsiiada aryzdary qabyldanyp, qylmystyq is qozǵalǵan.
«Tonalǵan býtikterimizge qatysty qylmystyq is qozǵaldy. Alaida, bul máseleni túbegeili sheshpeidi. Mysaly, maǵan keltirilgen shyǵyn kólemi 50 mln teńge. Taýardy men ózim Túrkiiadan tasymaldaimyn. Sondyqtan úkimet shyǵynymyzdy tolyq ótep berse degen ótinish bar. Sondai-aq, shyǵyndy óteý erejesine tiisti ózgerister men tolyqtyrýlar engizilip, biraz jeńildetilse», - deidi kásipker Ǵaliia Kýrgýlina.
«Aqiqat» qoǵamdyq komissiiasynyń jetekshisi Aiman Omarova kásipkerlerge kómektesetinin atap ótti.
«Qoǵamdyq komissiiaǵa júgingen kásipkerler, qazir aryzdaryn jazyp, qoldarynda bar qujattaryn usynyp jatyr. Biz olarǵa barynsha kómektesýge tyrysamyz. Memleketten kómek suraimyz. Bári zań aiasynda sheshiledi dep úmittenemin», - deidi Aiman Omarova.
