Qylmystyq ister boiynsha 1,5 myńnan asa jeke jáne zańdy tulǵalar jábirlenýshi dep tanyldy. Bul týraly IIM tergeý departamentiniń bastyǵy Sanjar Ádilov aitty, dep habarlaidy QazAqparat.
«Ishki ister ministrligi qańtar oqiǵalaryn tergeý men eldegi quqyqtyq tártipti qamtamasyz etý boiynsha jumysty jalǵastyrýda. Qazirgi ýaqytta ishki ister organdary tergeýshileriniń qaraýynda 2729 qylmystyq is bar, olar boiynsha 255 adam kúzetpen ustalýda. Sonymen birge jasaǵan áreketiniń aýyrlyǵyn, jeke basynyń minezdemesin eske otyryp, sottar 140 adamǵa qoǵamnan alshaqtatýǵa bailanysty emes bultartpaý sharalaryn taǵaiyndady: úiqamaq - 62, kepil - 33, eshqaida shyqpaý týraly qolhat - 45. Buryn atalǵandai qylmystyq isterdiń negizgi bóligi kelesi qylmystar boiynsha tergelýde: urlyq - 1 844, qarýdyń zańsyz ainalymy - 343, múlikti qasaqana búldirý nemese joiý – 144», - dedi Sanjar Ádilov Ortalyq kommýnikatsiialar qyzmetinde.
Onyń aitýynsha, qylmystyq ister boiynsha 1,5 myńnan asa jeke jáne zańdy tulǵalar jábirlenýshi dep tanyldy.
«12 myńnan astam adamnan jaýap alynǵan, 2 myńnan astam ártúrli sot saraptamalary taǵaiyndalǵan. Sotqa deiingi tergeýdiń sapasy jáne onyń jedel aiaqtalýy erekshe nazarǵa alynǵan», - dedi Ádilov.
