El azamattary qańtar oqiǵasy kezinde urlanǵan 68 qarýdy óz erikterimen tapsyrdy. Bul týraly QR IIM Tergeý departamentiniń bastyǵy Sanjar Ádilov aitty, dep habarlaidy QazAqparat.
«Urlanǵan qarýdy izdeý men alý boiynsha is-sharalar jalǵasýda. Búgingi tańda alynǵan qarýdyń jalpy sany 967 birlikti jáne 19 myńnan astam oq-dárini quraidy. Mysaly, Taldyqorǵanda 5 qańtarda jappai tártipsizdikterge belendi qatysqan, qalalyq politsiia basqarmasynyń ǵimaratynan 7 Makarov tapanshasy men 1 Kalashnikov avtomatyn urlaǵan osy qalanyń úsh turǵyny ustaldy. Urlanǵan qarý tárkilendi. Kúdikti adamdar sot sanktsiiasymen qamaýǵa alyndy. Jambyl oblysynda Taraz qalasynyń turǵyny ustaldy. Onyń garajynda 4 avtomat, 8 jaraqattaityn tapansha, 1 gazdy tapansha, olardyń oqsalǵyshtary, 945 birlik oq-dári jáne sýyq qarý tabylyp alyndy. Qarýdyń 68 birligi erikti túrde tapsyryldy. Azamattardy taýyp alǵan qarýdy erikti tapsyrýǵa taǵy da shaqyramyn. Ol ákimshilik te qylmystyq ta jaýapkershilikti týyndatpaidy», - dedi ol Ortalyq kommýnikatsiialar qyzmetindegi brifing barysynda.
onyń dereginshe, qabyldanǵan is-sharalar nátijesinde azamattar men biznes sýbektileriniń jalpy somasy 110 mln teńgege baǵalanatyn urlanǵan múlki, onyń ishinde 10 avtomashina, turmystyq tehnikanyń 301 birligi, 188 birlik zergerlik buiym, 250 uialy telefon, 16 mln teńge, kiimniń 472 birligi alynǵan.
«Kúdikti adamdardyń ómir salty men jeke basyn zerdeleý olardyń úshten biri – 113 buryn sottalǵan, onyń ishinde kisi óltirý, zorlaý, qaraqshylyq úshin, al 8-i urlyq, tonaý siiaqty qylmystar úshin respýblikalyq izdestirýde bolǵanyn kórsetedi», - dedi Sanjar Ádilov.
