Qańtar oqiǵalarynan keiin jalǵan aqparat taratý jiilep ketti. Bul týraly QR IIM Tergeý departamentiniń bastyǵy Sanjar Ádilov aitty, dep habarlaidy QazAqparat tilshisi.
«Qańtar oqiǵalarynan keiin azamattardyń qoǵamdyq sanasyn baqylaý úshin aqparattyq soǵys bastaldy. Áleýmettik jeliler arqyly kórineý jalǵan aqparatty taratý jaǵdailary jiiledi. Feik habarlamalar dep atalyp ketkenderdiń negizgi úlesi shetelden keledi. Búgingi tańda áleýmettik jelilerden shetelde tirkelgen 50 akkaýnt anyqtaldy», - dedi ol Ortalyq kommýnikatsiialar qyzmetindegi brifing barysynda.
Onyń dereginshe, QR QK-niń 274-baby (kórineý jalǵan aqparatty taratý) boiynsha 13 qylmystyq is tirkeldi. Olar boiynsha muqiiat tergeý júrgizilýde. Eki adam qamaýǵa, taǵy ekeýi úiqamaqqa alyndy.
«Mysaly, jappai tártipsizdikter kezinde Qostanai qalasynda «Telegram» messendjerinde óz atynan SOBR qyzmetkerleri ereýilshiler jaǵyna shyqqany týraly jalǵan aqparat taratqan azamat ustaldy. Sonymen qatar qyzmetker atynan «olar eshkimdi ustamaityny, barlyǵyn ereýilge shyǵýǵa shaqyrý» týraly eki mátindik habarlama salǵan. Kelesi oqiǵada, Aqmola oblysynyń turǵyny jappai tártipsizdikterden soń 2022 jylǵy 10 qańtarda eldegi jaǵdaidy ýshyqtyrý maqsatynda óziniń «Facebook» paraqshasyna «politsiia qyzmetkerlerin óltirýge úgitteitin» jazba engizgen. Azamattardy arandatýǵa kónbeýge jáne tekserilgen aqparat quraldaryna ǵana senýge taǵy da shaqyramyz», - dedi Sanjar Ádilov.
