Qańtar oqiǵalaryna bailanysty 9 257 ákimshilik is qaraldy. Bul týraly búgin Ortalyq kommýnikatsiialar qyzmetinde QR Bas prokýratýrasy birinshi qyzmet basshysynyń orynbasary Eldos Qilymjanov málim etti, dep habarlaidy QazAqparat.
«Bas prokýratýra azamattardyń konstitýtsiialyq quqyqtaryn qorǵaý jáne qańtardaǵy oqiǵalarda jasalǵan qylmystardyń mán-jailaryn anyqtaý jumystaryn jalǵastyrýda. El Prezidentiniń aýyrlatatyn mán-jailar bolmaǵan kezde, jazany jeńildetý jónindegi tapsyrmasyn oryndaý aiasynda tiisti jumys júrgizildi. Búgingi kúni sottar qańtar oqiǵalaryna bailanysty 9 257 ákimshilik isti qarady. Olardyń jartysyna jýyǵy eshqandai jaza qoldanbai qaraldy - 4 584 adamǵa sot eskertý jasady», - dedi Qilymjanov.
Onyń aitýynsha, qazirgi ýaqytta prokýrorlardyń ótinishteri boiynsha qamaýǵa alýdan 1 149 adam bosatyldy, 577-si boiynsha aiyppuldar eskertýlerge aýystyryldy, 393-i ákimshilik is quramy bolmaýyna bailanysty tolyǵymen toqtatyldy.
«Osylaisha, sotpen ákimshilik qaýmaýǵa alynǵan 3 314 adamnyń ishinen búgingi kúni tek 63-i qamaýda qalǵanyna erekshe nazar aýdaramyn. Bul rette prokýrorlardyń ákimshilik jazany jeńildetýge arnalǵan taǵy 13 ótinishhaty sottarda qaralýda», - dedi Eldos Qilymjanov.
«Jalpy, biyldyń 25 qańtaryndaǵy jaǵdai boiynsha jedel-tergeý toptarynyń óndirisinde 2 044 qylmystyq is bar. Osy ister boiynsha 898 kúdikti ustalǵan. Olardyń ishinen 802-si sottyń sanktsiiasymen qamaýǵa alyndy, 50-ine úi qamaǵy, al 21 adamǵa kepil, 12-ine eshqaida ketpeý qolhaty taǵaiyndaldy. 13-i boiynsha bultartpaý sharasy týraly másele qaralýda», - dedi Bas prokýratýra ókili.
