QR Bas prokýratýranyń Qylmystyq qýdalaý qyzmeti bastyǵynyń orynbasary Eldos Qilymjanov qańtar oqiǵasy kezinde bolǵan qylmystardy tergeý barysyn baiandady, dep habarlaidy QazAqparat.
«Jedel-tergeý toptarynyń óndirisinde sotqa deiingi 3 666 tergep-tekserý isi bar. Terrorizm aktileri men jappai tártipsizdikter týraly isterden basqa, tonaý, urlyq, qarýdy urlaý, quqyq qorǵaý organdarynyń qyzmetkerlerine qatysty kúsh qoldaný faktileri tergelýde. Atalǵan sanattan 162 aiyptalýshyǵa qatysty 101 qylmystyq is sotqa joldandy. 62 adam túrli jazalarǵa sottaldy», - dedi E. Qilymjanov Ortalyq kommýnikatsiialar qyzmetinde.
Onyń aitýynsha, Almaty qalasy Almaly aýdany sotynyń úkimimen Ońtai jáne Jeńishan esimdi turǵyndar «Alpamys» ańshylyq dúkeninen qarý urlaǵany úshin kináli dep tanyldy. Sot atalǵan adamdarǵa bes jyl merzimge bas bostandyǵynan aiyrý jazasyn taǵaiyndady.
Qańtar oqiǵalary kezinde 4 myńnan astam adam túrli dárejede jaraqat alǵan. Olardyń ishinde 2402-si – politsiia qyzmetkerleri, 990-y – qoǵamdyq tártipti qamtamasyz etýge tartylǵan áskeri qyzmetshiler.
«Quqyq qorǵaý organdary qylmysqa qatysqandardy anyqtaý jáne jaýapqa tartý boiynsha barlyq qajetti sharalardy atqarýda. Aqtóbe qalasynda uialy telefon beinejazbasynyń arqasynda I. esimdi azamattyń 5 qańtarda VAZ-21014 avtokóligin basqaryp, oblys ákimdigi aldynda politseilerdi úlken jyldamdyqpen soqqany anyqtaldy. Nátijesinde 4 politsei dene jaraqattarymen aýrýhanaǵa jatqyzyldy. Politsiia qyzmetkerleriniń ómirine qolsuǵýshylyq áreketi úshin bul turǵyn sot sanktsiiasymen qamaýǵa alyndy. Sonymen qatar T. jáne I. esimdi turǵyndar dýbinkalardy paidalanyp, Almaty qalasy ákimdiginiń aldynda politsiia qyzmetkerin qatty soqqyǵa jyqqan. Atalǵan adamdar qamaýda otyr», - dedi Eldos Qilymjanov.
