Qańtar oqiǵalary kezinde tergeý izoliatorlaryna 267 adam dene jaraqatymen tústi. Bul týraly QR Qylmystyq-atqarý júiesi komiteti tóraǵasynyń orynbasary Meiram Aiýbaev aitty, dep habarlaidy QazAqparat.
«Qańtar aiyndaǵy oqiǵalar kezinde tergeý izoliatorlaryna 267 adam dene jaraqatymen tústi. Olardyń 33-i qalalyq aýrýhanalarda emdeldi. Qalǵandaryn tergeý izoliatorlarynyń meditsinalyq qyzmetteri emdedi. Biraq olardy únemi azamattyq dárigerler qarap júr. Olar jaraqattaryn jappai tártipsizdik kezinde, ákimshilik ǵimarattarǵa, qyzmetkerlerge shabýyl jasaǵanda alǵan. Biz olardy tergeý izoliatoryna qabyldaǵan kezinde tirkedik», - dedi tóraǵa orynbasary Ishki ister ministrliginiń baspasóz qyzmeti alańynda ótken brifingide.
Onyń dereginshe, búgingi tańda qamaýdaǵy tek 1 adam Taraz qalasynyń aýrýhanasynda em alyp jatyr. Taǵy 30 adam basqa tergeý izoliatorlarynda emdelýde.
«Biz qamaýǵa alynǵandardyń týystaryn ýaiydamaýǵa jáne jaqyndary týraly jalǵan aqparatqa senbeýge shaqyramyz. Tikelei mekemelerge baryńyz. Ol jerde sizder aqparatty meditsinalyq qyzmetkerlerden ala alasyz. Mekemelerden alshaq jerde turatyn týystar úshin Qylmystyq-atqarý júiesi komitetinde jáne aýmaqtyq departamentterde koll-ortalyqtar jumys isteidi. Qoǵamdyq komissiialar, depýtattar, qoǵamdyq monitoring toptary tergeý izoliatorlaryna barǵannan keiin olarǵa ustaýdyń tyiym salynǵan jaǵdailary týraly qandai da bir shaǵym túsken joq», - dedi Meiram Aiýbaev.
