Biylǵy jyl basynan jolaýshylar poiyzdarynan túrli sebeppen 93 adam túsirilgen, dep habarlaidy "Ult aqparat".
QR IIM Kóliktegi politsiia departamentiniń baspasóz qyzmetinen málim etkendei, qańtar aiynda elimizdiń kólik politseileri jolaýshylar poiyzdarynan 93 adamdy túsirip alǵan. Onyń ishinde 73-i – alkogoldi mas kúide bolǵan, 25-i usaq buzaqylyq jasaǵan.
Bir ǵana mysal, Aral stantsiiasynda «Aqtóbe-Almaty» baǵytyndaǵy jolaýshylar poiyzynan quqyq buzýshy túsirilgen. Atalǵan poiyzdyń bastyǵy Jelilik politsiia bólimshesiniń kezekshi bólimine akti túsirgen. Tekserý barysynda kólik politseileri qoǵamdyq orynda masań kúide bolǵan Túrkistan oblysynyń 39 jastaǵy turǵynyn anyqtady.
Kóliktegi politsiia departamenti bastyǵynyń birinshi orynbasary Qalijan Qoblandinniń aitýynsha, dál osyndai jaǵdai Aqmola oblysynyń Jaqsy stantsiiasynda boldy. Tártip saqshylary «Almaty-Qostanai» baǵytyndaǵy jolaýshylar poiyzynda alkogoldik ishimdik iship, qoǵamdyq orynda balaǵat sózder aitqan, osylaisha qoǵamdyq tártip pen jolaýshylardyń tynyshtyǵyn buzǵan 39 jastaǵy er adamdy poiyzdan túsirip alǵan.
«Meditsinalyq kýálandyrýdyń qorytyndysyna sáikes, quqyqbuzýshylar «ortasha» dárejede masań kúide bolǵan. Olarǵa qatysty QR ÁQBtK-niń 440-baby, iaǵni alkogoldik ishimdikterdi ishý nemese qoǵamdyq oryndarǵa masań kúide kelý jáne QR ÁQBtK-niń 434-baby, iaǵni usaq buzaqylyq boiynsha ákimshilik hattamalar toltyrylyp, olarǵa 15 AEK mólsherinde aiyppul salyndy», - delingen aqparatta.
