Qazaqstan qarjy qaýymdastyǵynyń taldaý ortalyǵy qolma-qol aqshasyz tólemder boiynsha statistikaǵa sholý jasady, dep habarlaidy "Ult aqparat" qaýymdastyqtyń baspasóz qyzmetine silteme jasap.
2020 jyldyń qańtarynda QR aýmaǵynda jasalǵan qolma-qol aqshasyz kartochkalyq tólemder kólemi 1 586,9 mlrd teńgeni qurap, ótken jyldyń sáikes kezeńimen salystyrǵanda 2,7 esege artty. Jeltoqsanǵa qaraǵanda tómendeý 17%-dy qurady, bul maýsymdyq faktordyń áserimen jáne uzaq jańa jyldyq merekelerge bailanysty bolýy múmkin.
Sonymen qatar, qańtar aiynyń qorytyndysy boiynsha QR aýmaǵynda kartochka boiynsha tólemderdiń jalpy kólemindegi Almaty qalasynyń úlesi ózgergen joq - 35%. Odan ári Nur-Sultan qalasy – 17% (-1%), Túrkistan oblysy jáne Shymkent qalasy – 7% (+1%) tur.
«Byltyrǵy jeltoqsanmen salystyrǵanda qolma-qol aqshasyz tólem kólemi barlyq óńirlerde tómendedi. Alaida, qolma-qol aqshasyz tólemder jyldyq eseppen aitarlyqtai ósimdi kórsetedi. Eń úlken ósim Qyzylorda, Túrkistan, Aqtóbe oblystarynda jáne Shymkentte baiqalady. Kartochka paidalana otyryp qolma-qol aqshasyz tólem boiynsha «ortasha chek» qazirgi ýaqytta 11 553 teńgeni (ótken jylǵy qańtarda — 9 916) quraidy, al bankomattan alý somasynyń ortasha mólsheri osy mólsherden shamamen 4 ese asyp, 45 366 teńge (45 744) boldy» delingen habarlamada.
QR aýmaǵynda qańtar aiynda jasalǵan qolma-qol aqshasyz kartochkalyq tólemder kóleminiń 74%-y internette tóleýge, al 25% POS-terminal arqyly tóleýge tiesili. Bul rette sońǵy 12 aida Qazaqstanda kartochkalar boiynsha tranzaktsiialardyń jalpy kóleminde POS-terminaldardyń úlesi 20%-ǵa tómendedi.
2020 jylǵy 1 aqpandaǵy jaǵdai boiynsha bankterdiń ainalymdaǵy kartochkalarynyń sany 33,9 mln jetip, kartochka ustaýshylardyń sany – 30,7 mln boldy (2019 jylmen salystyrǵanda – tiisinshe 43,4% jáne 57,6% ósim baiqalady).
Qazaqstan aýmaǵynda qolma-qol aqshasyz operatsiialardyń negizgi úlesi internet/mobildi banking (tiisinshe 44,7% jáne 74,3%) jáne POS-terminaldar (qolma-qol jasalmaityn operatsiialardyń jalpy sany, kóleminen tiisinshe 55,0% jáne 24,7%) arqyly júrgizildi.
