QR Premer-Ministri Asqar Maminniń tóraǵalyǵymen ótken Úkimet otyrysynda elimizdiń 2020 jylǵy qańtardaǵy áleýmettik-ekonomikalyq damýynyń qorytyndylary jáne respýblikalyq biýdjettiń oryndalýy máseleleri qaraldy, dep habarlaidy "Ult aqparat" primeminister.kz saityna silteme jasap.
Ekonomikanyń, bank salasynyń jai-kúii, respýblikalyq biýdjettiń atqarylýy, memlekettik satyp alýlardaǵy jergilikti qamtý týraly QR ulttyq ekonomika ministri R. Dálenov, Ulttyq Bank tóraǵasynyń orynbasary A. Baimaǵambetov jáne Premer-Ministrdiń Birinshi orynbasary – qarjy ministri Á. Smaiylov baiandady.
2020 jyldyń birinshi aiynyń qorytyndysy makroekonomikalyq kórsetkishterdiń oń serpinin kórsetti. Osy jylǵy qańtarda JIÓ ósimi 2019 jylǵy qańtardaǵy 2,9%-ǵa qaraǵanda 3,6%-ǵa deiin jyldamdady. Negizgi kapitalǵa salynǵan investitsiialar 3,1%-ǵa ósti.
Ekonomikanyń barlyq negizgi salalarynda oń serpin baiqalady: qurylysta ósim 12,5%-dy, saýdada – 5,2%-dy, kólik salasynda – 3,6%-dy, taý-ken ónerkásibinde, óńdeý sektorynda, onyń ishinde mashina jasaýda 21%-dy, qara metallýrgiiada 17,5%-dy qurady.
Ulttyq qordyń aktivteri 6,8%-ǵa $61,9 mlrd-qa deiin ulǵaidy, respýblikalyq biýdjetke túsetin kirister 929,7 mlrd teńgege jetti (josparǵa 95%), ósý qarqyny 131%-dy qurady.
2020 jylǵy qańtarda 732 myń sharshy metr turǵyn úi paidalanýǵa berildi. Nur-Sultan jáne Almaty qalalarynda, sondai-aq Mańǵystaý oblysynda turǵyn úilerdiń kóbirek paidalanýǵa berilgeni belgilengen.
«Elbasy Nursultan Ábishuly Nazarbaev pen Prezident Qasym-Jomart Kemeluly Toqaevtyń tapsyrmalaryn oryndaý maqsatynda biyl birinshi aidan bastap ekonomikanyń ósý qarqynyn saqtaý qajet», — dedi A. Mamin.
Premer-Ministr Atyraý, Túrkistan, Pavlodar jáne Shyǵys Qazaqstan oblystarynda osy jyldyń qańtar aiynda negizgi kórsetkishter boiynsha oń dinamika baiqalatynyn atap ótti.
Úkimet basshysy memlekettik organdar men óńirler basshylarynyń investitsiialardy tartý, shaǵyn jáne orta biznesti damytý, eńbek ónimdiligin jáne halyqtyń naqty tabysyn arttyrý jónindegi jumysty kúsheitýi qajet ekenin atap ótti.
